A orca Tahlequah, coñecida polos científicos como J35, deixou de cargar e manter á boia á súa cría morta despois de 17 días e 1.000 millas percorridas en augas do Pacífico próximas ás costas de EEUU e Canadá. Trátase de algo usual entre golfiños, orcas e outros mamíferos como unha expresión de aflición, pero ata agora non se coñecía un caso no que o duelo durase tanto, segundo explican os expertos.
Crese que a cría morreu o 24 de xullo fronte ás costas de Vitoria, en Canadá.
Tahlequah, de 20 anos, forma parte dunha comunidade de 75 orcas agrupadas en tres mandas que conviven entre o extremo sur da illa de Vancouver, en Canadá, e as augas do estado de Washington, en EEUU.
Esta comunidade está en perigo de extinción e a orca J35 é un membro extraordinariamente valioso do clan debido ao seu potencial reprodutivo. "J35 pasou pola miña fiestra con outras baleas, e loce vigorosa e saudable. A terrible experiencia de vela levar á cría durante polo menos dezasete días e mil millas terminou, grazas a deus", declarou nun comunicado Ken Balcomb, o director fundador do Centro de Investigación de Baleas de EEUU.
A falta de salmón "chinook", fonte principal de alimento das orcas, é a razón fundamental de que as crías enfermen e morran. O ruído dos barcos confunde tamén ás orcas e interrompe o seu comportamento natural á hora de buscar alimento.
A desnutrición nun depredador que necesita nadar 75 millas por día produce nas orcas un impacto devastador. Balcomb dixo que J35 probablemente perda a outros dous descendentes desde que deu a luz a un macho en 2010.
A preocupación principal era que non estivese a se nutrir adecuadamente, pero os investigadores aseguran que J35 non mostrou signos de cabeza "de maní", unha condición que apunta á desnutrición nunha orca, a medida que os ósos do cranio comezan a mostrarse. "Estivo comendo", asegurou Balcomb.
Ao mesmo tempo, os investigadores da zona estiveron atendendo á orca J50, da mesma poboación, un animal de catro anos e medio que perdeu o 20% da súa masa corporal e está en risco de perder a base do cranio. Os biólogos comezaron a alimentar este domingo á orca, á que inxectaran antibióticos o xoves pasado.
