O Consello de Ministros aprobou este venres un Real Decreto Lei para subir un 1,6% as pensións e un 3% as mínimas e non contributivas para o próximo ano, tal e como se establecía no acordo orzamentario alcanzado entre o Goberno e Unidos Podemos.
Así o sinalou o presidente do Goberno, Pedro Sánchez, na última rolda de prensa posterior ao Consello de Ministros do ano, onde tamén deixou claro que a subida do 1,6% será seis décimas por encima das previsións do IPC para 2019.
"Haberá ganancia de poder adquisitivo fronte a anos de diminución constante polo sistema anterior de cálculo", apostilou o presidente, tras afirmar que as pensións "son un dereito de cidadanía e non unha mercancía coa que facer negocio".
Subir as mínimas e non contributivas terá un custo de 384 millóns de euros, mentres que á subida do resto das pensións conforme o IPC previsto para o ano destinaranse 704 millóns de euros.
