O ministro de Asuntos Exteriores, Josep Borrell, presentou este luns unha páxina web da Moncloa que pretende ser o punto informativo para cidadáns e empresas sobre todo o relacionado co Brexit, un proceso no que o Goberno aspira a garantir os dereitos sociais e empresariais.
A web é parte do esforzo que está a realizar o Goberno para estar preparado no caso de que a saída do Reino Unido da Unión Europea se produza sen acordo, un proceso coñecido como Brexit duro e para o que, segundo o ministro, "España está especialmente ben preparada".
O propio presidente do Goberno, Pedro Sánchez, anunciou a nova web cun tuit no que sinalou que o Goberno "traballa para garantir os intereses da cidadanía" e anima a consultar o sitio Preparados para o Brexit aloxado na páxina web da Moncloa.
Ademais, o Goberno ten tamén listo un paquete normativo en forma de real decreto lei que aprobará a principios de febreiro e que inclúe as normas e autorizacións necesarias para afrontar unha ruptura sen acordo.
Finalmente, está prevista unha "actuación loxística" que prevé as necesarias dotacións de persoal e material a sectores que se vexan máis afectados nun primeiro momento por un Brexit duro, por exemplo no control de fronteiras.
"O obxectivo principal de todos estes esforzos é lanzar unha chamada de tranquilidade aos cidadáns e que saiban que teñen todos os seus dereitos garantidos", precisou Borrell nun encontro con xornalistas. "Que estean tranquilos, porque pase o que pase, temos acordos bilaterais entre España e o Reino Unido que garanten que tantos os españois no Reino Unido, como os británicos en España manterán a plenitude dos seus dereitos, incluso o voto nas municipais", subliñou.
Así, o ministro adiantou que España e Reino Unido asinarán o próximo día 21 de xaneiro un acordo polo que se mantén a posibilidade de votar nos comicios municipais a nacionais británicos residentes en España e viceversa, independentemente do que ocorra co Brexit.
Tamén os acordos alcanzados entre España e o Reino Unido sobre Xibraltar —recollidos como memorándum no acordo de saída— manterán a súa vixencia independentemente de como sexa a saída británica da UE, xa que son acordos bilaterais sobre "irritantes" da relación que se poderían asinar á marxe do Brexit.
A pesar de toda esta preparación, ao ministro non lle consta que ninguén do Goberno calcule de xeito oficial o custo tanto das medidas previstas como do impacto dun Brexit duro no PIB español, nin nos ministerios nin na Presidencia do Goberno.
