O portavoz do PP no Senado, Ignacio Cosidó, confirmou que a senadora por Murcia, a lucense Pilar Barreiro, ocupará de novo un escano do Grupo Popular no próximo pleno da Cámara Alta, o do 6 de novembro, unha vez que o Tribunal Supremo arquive a súa causa sobre o caso Púnica.
Barreiro vai realizar os trámites para abandonar o Grupo Mixto e volver ao PP de maneira que o vindeiro martes poida participar na actividade parlamentaria de novo como membro do Grupo Popular. Todos os martes de pleno, a formación celebra horas antes da sesión unha reunión con todos os seus senadores, unha cita á que poderá acudir de novo Barreiro e na que recibirá a benvida dos seus compañeiros de filas, apuntan fontes populares.
A parlamentaria abandonou o Grupo o pasado mes de marzo para facilitar o acordo orzamentario do Goberno de Mariano Rajoy con Ciudadanos, que puxera como condición para apoiar as contas que o PP a apartase das súas filas. A propia Barreiro explicou que o fixo para evitar "que uns indesexables" utilizasen o seu nome contra a xestión do Executivo de Rajoy.
"Sempre confiei na Xustiza e na verdade, e síntome moi feliz, non só porque con esta, xa son doce as veces que intentaron esnaquizarme a vida con mentiras e non o conseguiron, senón porque grazas a esta decisión do Tribunal Supremo tamén se restablece a honra do noso Partido", engadiu a senadora unha vez coñecido o arquivo da causa.