O presidente de Venezuela, Nicolás Maduro, rexeitou este domingo a posibilidade de abandonar o poder ou de convocar novas eleccións presidenciais, porque "non acepto ultimatums de ninguén".
Nunha entrevista coa canle española de televisión La Sexta, Maduro asegurou que o presidente estadounidense, "Donald Trump impuxo a Occidente unha política equivocada" sobre Venezuela, e afirmou: "Non nos imos someter".
A conversación entre Maduro e o xornalista Jordi Évole (quen xa o entrevistou en outubro de 2017) tivo lugar no Palacio de Miraflores e emitiuse xusto cando concluía este domingo o ultimato de oito días que España e outros países da Unión Europea lle deron para convocar eleccións presidenciais ou pola contra recoñecerán a Juan Guaidó como presidente interino.
Guaidó, presidente da Asemblea Nacional, xurou o cargo como presidente provisional tras non recoñecer a validez da recente toma de posesión de Maduro debido a que non considera lexítimas as eleccións presidenciais de maio pasado.
Mesmo, suxeriu a posibilidade dunha convocatoria para renovar a Asemblea Nacional: "o que está a necesitar Venezuela é unha renovación do Parlamento".
Na entrevista, que estivo marcada por reproches ou respostas críticas de Évole a algunhas afirmacións de Maduro, este denunciou repetidamente que "Venezuela é vítima" dunha campaña de agresión encabezada por Trump e seguida "de maneira perruna" por algúns gobernos de dereita de América Latina.
"Estamos ameazados pola maior potencia do mundo. A opción militar está sobre a mesa de Donald Trump", insistiu, aínda que recalcou que "isto non ten por que acabar mal".
En cambio, encomiou a posición de Gobernos como os de México ou Uruguai, que convocaron "unha conferencia" para promover unha saída dialogada á crise. "Trump impuxo a Occidente unha política equivocada. Non nos imos someter", asegurou, das mesma forma que afirmou: "Eu non me nego a convocar eleccións, hai eleccións presidenciais en 2024".
CRÍTICAS A SÁNCHEZ. Preguntado acerca de se pensa irse do cargo, a súa resposta foi: "Irse para onde?", e criticou aos dirixentes europeos, especialmente ao presidente do Goberno español, Pedro Sánchez, polo ultimato que concluíu este domingo.
Neste sentido, considerou que Sánchez, igual que os demais, "encartouse" aos designios da Casa Branca, e acusou ao dirixente español de ser "un farsante" porque "non foi electo por ninguén", mesmo se Évole lle lembrou que en España é o Congreso o que elixe o presidente do Goberno.
Tamén tivo palabras críticas contra os dirixentes do centro dereita español Pablo Casado (Partido Popular) e Albert Rivera (Cidadáns), aos que acusou de ter "unha visión neocolonial" de Venezuela.
Maduro insistiu en culpar do exterior á gran maioría dos problemas políticos, económicos e sociais que sofre o país, e mesmo nunha ocasión acusa o xornalista de estar "envelenado" pola campaña exterior na súa contra.
Con todo, Maduro tamén admite "erros" de xestión. "Somos vítimas dunha agresión externa, pero sen dúbida somos responsables de moitas cousas".
Cuestionado sobre a inflación e a crise de abastecementos de produtos básicos, insistiu en que o seu país afronta "unha guerra económica brutal", pero "non ten unha crise humanitaria", senón política.
Aínda así, recoñeceu que as sancións económicas de Estados Unidos "fannos dano", aínda que asegurou que "non van poder connosco".
Sobre Guaidó, Maduro asegura que "hai un só presidente" en Venezuela, xa que el controla todos os resortes executivos do poder, polo que "non hai un Goberno paralelo".
E aínda que afirmou estar "aberto ao diálogo", non deixou de lembrar que o ministerio público pediu ao Tribunal Supremo iniciar un xuízo contra Guaidó "por posible violación constitucional por parte dese deputado".
Maduro cualificou de "paiasada" a asunción da presidencia interina por parte de Guaidó. Évole chegou a marcar co seu teléfono unha chamada a Guaidó, para tentar unha conversación con Maduro, pero saltou o contestador e a caixa de correos de mensaxes estaba cheo.
Aínda así, Maduro envioulle unha mensaxe: que "pense ben, o que está a facer" e non faga dano ao país coa súa "estratexia golpista".
E explicou que "moita xente foise enganada", aínda que asegurou que moitos "se foron cunha falsa visión, déronse conta" e "miles están a regresar".
A entrevista comezou cunha pregunta de Jordi Évole sobre os xornalistas de varios países estranxeiros detidos brevemente a pasada semana, entre eles tres enviados membros dun equipo da Axencia EFE que foron capturados o día 30 en Caracas e liberados ao día seguinte.
Maduro asegurou que "non houbo detención de xornalistas" e que só se tratou dun "recoñecemento" como ocorre doutros países. Con todo, o equipo de EFE, enviado desde Bogotá, xa pasara ese recoñecemento varios días antes ao identificarse como xornalistas á súa chegada ao aeroporto de Caracas.
