A primeira ministra británica, a conservadora Theresa May, afirmou este mércores nunha intervención a porta pechada fronte aos seus deputados, antes de someterse a unha moción de confianza, que non se presentará ás próximas eleccións, previstas para 2022. "Foi extremadamente clara: non liderará ao Partido Conservador nas próximas eleccións", afirmou aos medios o deputado tory Nick Boles tras o discurso, quen cre que May "merece agora o apoio de todos os conservadores para que poida seguir co seu traballo".
A xefa de Goberno necesita obter unha maioría simple nunha votación á que están convocados os 317 deputados conservadores para manterse á fronte do partido e o Goberno británico. Durante a xornada, máis de 170 parlamentarios expresáronlle apoio, mentres que ao redor de 30 avanzaron que se pronunciarán na súa contra, segundo calcularon medios británicos, aínda que a votación, que concluirá sobre as 20.00 GMT, é secreta.
"Vai sobrevivir e creo que sairá máis forte disto", dixo pola súa banda o deputado Tobias Ellwood tras escoitar o discurso de May nunha sala da Cámara dos Comúns. A moción de confianza foi activada pola á máis euroescéptica dos conservadores, que están descontentos co acordo sobre o "brexit" ao que chegou May con Bruxelas.
