Polo menos dous surcoreanos morreron e ducias de persoas máis resultaron feridas, algunhas delas deportistas que participan no mundial de natación de Gwangju, ao colapsar unha estrutura dentro dun club nocturno desa cidade, segundo fontes oficiais.
Os feitos rexistráronse cara ás 02.30 hora local (19.30 GMT do venres) nun local chamado Coyote Ugly. A maioría dos feridos teñen lesións moi leves, aínda que uns 17 sufriron feridas de maior consideración, pero non graves, segundo informaron fontes dos bombeiros á axencia local de noticias Yonhap.
Gwangju, 330 quilómetros ao sur de Seúl, é sede do mundial de natación que comezou o pasado 12 de xullo e pecharase este domingo.
CAUSAS. Sobre a estrutura que colapsou, situada a 2,5 metros sobre o piso principal, había un centenar de persoas. As primeiras pescudas indican que puido ceder por un exceso de peso. No club nocturno había unhas 370 persoas cando se rexistrou o accidente.
Nove dos feridos, que sufriron lesións non graves, son deportistas estranxeiros: catro estadounidenses, dous neozelandeses, un holandés, un italiano e un brasileiro.
Entre eles había seis mulleres e a excepción do brasileiro o resto eran xogadores de waterpolo, segundo as mesmas fontes.
DEPORTISTAS AFECTADOS. A federación estadounidense de waterpolo confirmou que varios dos seus deportistas, sen precisar mais, resultaron feridos cando celebraban a vitoria da selección feminina na final contra España, disputada o venres.
"É unha horrible traxedia", afirmou nun comunicado o directivo da federación, Christopher Ramsey. "Todos os atletas de USA Water Polo están a salvo e foron localizados", agregou.
O comité organizador confirmou que sete dos nove deportistas feridos recibiron atención médica por lesións menores, e só un deles ten que regresar para que lle dean algúns puntos.
Tamén se atopan entre os lesionados dous uzbekos, pero non eran deportistas que participaban no mundial de Gwangju.
A maioría dos feridos sufriron pequenos cortes ou contusións leves.
Ao parecer, o club nocturno fora reformado recentemente pero as obras non contaban con autorización oficial.
