O Brexit mantense nun punto morto despois de que o Parlamento británico rexeitara as oito vías alternativas que propuxeran os deputados para tratar de desbloquear o proceso de saída da Unión Europea (UE).
O acordo que defende a primeira ministra, a conservadora Theresa May, tampouco ten unha maioría garantida se se volve a someter a votación, a pesar de que a xefa de Goberno ofreceu a súa dimisión a cambio de apoios para tratar de gañar respaldo entre os euroescépticos da súa formación.
Os deputados tomaran o control da axenda parlamentaria para forzar este mércores unha insólita votación, na que cada membro da Cámara dos Comúns marcou nunha papeleta as súas preferencias respecto de oito posibles vías para avanzar cara ao divorcio coa UE. A opción máis votada foi convocar un referendo para ratificar un eventual acordo, que, en todo caso, primeiro debería aprobarse no Parlamento. Esa opción recibiu 268 votos a favor e 295 en contra.
Tamén estivo entre as máis votadas negociar con Bruxelas unha unión aduaneira, o que amortecería as friccións na fronteira de Irlanda do Norte pero podería dificultar os acordos comerciais do Reino Unido con terceiros países. Esa vía obtivo 264 votos a favor, pero tampouco superou o limiar da maioría, ao recibir 272 votos en contra.
Ambas as posibilidades recibiron, con todo, máis votos que o acordo de May cando foi a sometido a votación por segunda vez este mes (242).
Onde si houbo un forte consenso foi nas alternativas que a Cámara dos Comúns non aceptará. Abandonar a UE sen un acordo non é unha opción para o Parlamento, xa que tan só 160 deputados apóiana —157 conservadores e 3 laboristas—. Continuar no mercado único, o que implica manter a libre circulación de cidadáns comunitarios no Reino Unido, tampouco. Só 65 parlamentarios están a favor.
Os deputados manteñen aberta a posibilidade de convocar unha nova rolda de votacións o vindeiro luns, aínda que non se tomou aínda unha decisión respecto diso.
Os resultados non son en todo caso vinculantes para o Goberno e May xa advertiu de que non condicionarán a súa estratexia. Existe con todo a posibilidade de que os deputados forcen a votación dunha lei que si obrigue ao Executivo a cumprir coa súa vontade se finalmente chegan a un consenso.
