O presidente do Goberno, Pedro Sánchez, volveu reclamar este mércores lealdade ao PP e non facer oposición "á conta de debilitar aínda máis a convivencia" entre comunidades, pero o portavoz popular, Rafael Hernando, advertiulle de que non terán esa lealdade con el, senón "con España, a Constitución e o Rei".
Sánchez acudiu á súa primeira sesión de control ao Goberno no Congreso como xefe do Executivo e a primeira pregunta que tivo que responder foi a de Hernando, na que lle pediu explicacións das contrapartidas que vai pagar aos "populistas", "independentistas", PNV e "amigos da vella Eta" por telo apoiado.
O presidente do Goberno instou ao PP a facer unha reflexión de por que están na súa situación actual, aprender dos seus erros e non repetir a súa actuación contra o Estatuto de Cataluña, e recalcou a necesidade de que os populares sexan leais co Estado aínda que non o sexan co Goberno. "Non axiten o agravio territorial. Para iso están outros grupos parlamentarios que non gobernaron e que resultan moito máis cribles que vostedes", agregou antes de acusar ao PP de provocar unha crise territorial de enorme envergadura.
Do mesmo xeito que fixo este martes na súa primeira sesión de control no Senado, pediu ao PP que sexa igual de leal co Goberno como o foron os socialistas co Executivo de Mariano Rajoy. Ademais, afeou aos populares que agora descualifiquen ao PNV polo mero feito de estar a apoiar ao actual Goberno e instounos a asimilar que a moción de censura supuxo un cambio de época na política española.
Tras sinalar ironicamente que a intervención de Hernando non fora nada populista, subliñou que os únicos compromisos do seu Executivo son coa rexeneración democrática, a reconstrución do dereitos e liberdades "desmantelados" polo anterior Goberno e a cohesión territorial que cre danada polo PP.
O portavoz do grupo popular considerou que o actual Goberno é "provisional" e dixo que xa empezou a pagar algúns prezos. Así, lamentou que xa avancen a súa disposición a modificar a Constitución "terxiversando" as sentenzas do Tribunal Constitucional e anuncien que vai cesar o control sobre as contas da Generalitat permitindo o impulso da "máquina de propaganda" da TV3 e a reapertura das denominadas embaixadas de Cataluña para atacar España.
Tamén lle reprochou estar disposto a usar a política penal para favorecer a algúns, en referencia aos dirixentes independentistas encarcerados.
Hernando, tras recordar que o Goberno xa anunciou aumentos de gasto público como fixo no seu día José Luis Rodríguez Zapatero, pediu ao xefe do Executivo que "non acabe como acabou Zapatero" porque os españois non o merecen. "A miña lealdade e a do meu grupo será con España, cos españois, coa Constitución e co Rei, non con vostede. Con vostede, a lealdade, aqueles", engadiu sinalando os escanos dos grupos que apoiaron a moción de censura.
