O Xulgado do Mercantil número 7 de Madrid aprazou este luns a vista previa pola demanda dun dos irmáns do falecido presidente de El Corte Inglés Isidoro Álvarez contra as súas sobriñas, Marta e Cristina Álvarez, e a Carteira de Valores IASA, que posúe un 22 % das accións da compañía.
O maxistrado adoptou esta decisión á espera de coñecer se o procedemento, que impugna a redución de capital de IASA realizada en 2016, se tramita de forma separada ou se se agrupa á interposta por María Antonia Álvarez, irmá de Isidoro e nai do expresidente do xigante comercial cesado o pasado 14 de xuño, Dimas Gimeno.
Segundo informaron a Efe fontes xurídicas, espérase que o Xulgado do Mercantil número 1 de Madrid, que admitiu a trámite este último escrito, comunique proximamente se atende a petición das partes, partidarias de unificar ambos os procedementos.
En 2016, as herdeiras de Isidoro Álvarez acordaron reestruturar a empresa cunha redución de capital que supuxo devolver máis de 140 millóns de euros en efectivo e outros activos, e que agora os demandantes reclaman ao entender que se tratou dunha operación realizada ás costas do resto de accionistas.
Controlada nun 70% polas irmás Marta e Cristina Álvarez, esta carteira aglutina o 22,18 % do capital de El Corte Inglés; nela participan tamén Gimeno, que ten o 2,8 % do grupo, e a súa nai e tío, María Antonia e César, que posúen o 4,2 %.
