O Tribunal Supremo inadmitiu a trámite a querela presentada por Vox contra o presidente do Goberno, Pedro Sánchez, polos delitos de falsidade documental e contra a propiedade intelectual, entre outros, ao non ver "infracción penal algunha" na súa tese doutoral.
A Sala Segunda do alto tribunal seguiu o criterio da Fiscalía e deu carpetazo á querela de Vox ao soster que para que exista plaxio, nun sentido xurídico, é necesario que haxa un propósito de enriquecemento coa obra allea, algo que o Supremo non observa neste caso.
A querela de Vox, presentada o pasado mes de setembro, apoiábase en informacións xornalísticas que afirmaban que Pedro Sánchez copiaría contidos da súa tese de traballos anteriores doutros autores, sen citalos e facéndoos pasar como propios.
Con todo, á marxe de que "as afirmacións da querela se apoien fundamentalmente en informacións xornalísticas", a Sala descarta que os feitos "presenten carácteres de delito".
A maior ou menor orixinalidade dunha tese, o seu valor dogmático son cuestións que han de ser avaliadas no ámbito académico e totalmente alleas ao dereito Penal
E engade: "A maior ou menor orixinalidade dunha tese, o seu valor dogmático e, en fin, o verdadeiramente innovador do seu contido, son cuestións que han de ser avaliadas no ámbito académico e totalmente alleas ao dereito Penal".
Tampoco ve delito o tribunal en relación á suposta promoción profesional da muller de Sánchez, Begoña Gómez, pola que o partido se querelou contra o presidente do Executivo por prevaricación administrativa, suborno e tráfico de influencias.
Vox acusaba a Sánchez na súa querela de utilizar "o poder político e institucional para que esta figurase como profesora de máster dunha universidade pública sen ter a titulación universitaria requirida".
Pero a xuízo do Supremo, tampouco existe aquí "ningún elemento fáctico" que "permita sustentar minimamente" o carácter delituoso dos feitos, "máis aló da información publicada por algúns medios de comunicación ou as opinións da propia entidade querellante sobre a formación ou capacitación" de Begoña Gómez.
Uns elementos que son "claramente insuficientes" para sustentar un proceso penal. Neste punto, a Sala recorda o informe que emitiu a Fiscalía o pasado mes de outubro, no que solicitaba o arquivo da querela e onde manifestou que "a mera afirmación por parte do querellante da existencia dun delito sen apoio obxectivo sobre a súa realidade non xustifica a apertura dun proceso penal".