O presidente de Estados Unidos, Donald Trump, anunciou este sábado a súa intención de prohibir no país a rede social chinesa TikTok, que Washington ve con receo por motivos de seguridade nacional. "No que respecta a TikTok, ímolo a prohibir en Estados Unidos", dixo a Trump en declaracións a xornalistas a bordo do avión presidencial Air Force One rumbo a Washington desde Tampa (Florida).
"Teño esa autoridade. Podo facelo cunha orde executiva", afirmou o mandatario, quen precisou que planea tomar a decisión canto antes.
A principios de mes, o secretario de Estado de EE UU, Mike Pompeo, xa deixou entrever que o Goberno de Trump consideraba restrinxir o acceso a TikTok en territorio estadounidense ante a posibilidade de que Pequín estea a utilizar a rede social como un medio para vixiar e distribuír propaganda no país norteamericano. Nun evento organizado polo diario The Hill, Pompeo explicou que a Administración estaba a valorar impoñer sancións e asegurou que "en breve" comunicarían ao público "a serie de decisións" que se tomaron.
TikTok é unha rede social desenvolvida pola firma chinesa Byte-Dance, con sede en Pequín, na que se comparten vídeos curtos e que logrou un grande éxito entre o público adolescente, pero que á vez levantou grandes dúbidas acerca da seguridade dos datos dos usuarios e dos seus vínculos co Partido Comunista Chinés.
A tensión entre Estados Unidos e China aumentou nos últimos meses azuzada pola pandemia de coronavirus que arrasa o mundo, na que ambos os países se culpan mutuamente dos efectos que causou entre a poboación de ambos os países.