Ao redor de 300 veteranos da II Guerra Mundial foron homenaxeados este mércores en Portsmouth, ao sur de Inglaterra, no acto de conmemoración do 75 aniversario do desembarco de Normandía, ao que asistiron a raíña Isabel II e o presidente de Estados Unidos, Donald Trump. A cerimonia tivo lugar na gran chaira de céspede do Southsea Common de Portsmouth, cidade portuaria que foi un dos puntos de embarque clave para moitos dos barcos militares dos aliados na xornada histórica coñecida como Día D
Durante o evento, tamén estiveron presentes a primeira ministra británica, Theresa May, o príncipe Carlos e varios xefes de Estado e de Goberno, entre eles, o presidente francés, Emmanuel Macron; a chanceler alemá, Angela Merkel, e o primeiro ministro canadense, Justin Trudeau.
Setenta e cinco anos despois de que as tropas aliadas loitasen de xeito conxunto na batalla de Normandía (6 de xuño-25 de agosto de 1944) para liberar os territorios da Europa occidental ocupados pola Alemaña nazi, aqueles soldados que deron a súa vida nas praias e confíns da cidade francesa foron aclamados en Portsmouth pola valentía e o sacrificio que mostraron entón.
Todos eles forman parte da narrativa universal contemporánea e, se non fose pola súa entrega nesta histórica operación militar, o desenlace da Segunda Guerra Mundial (1939-1945) podería ser moi diferente do que se recorda hoxe día.
HISTORIA VIVA. Minutos antes de que comezase a cerimonia, algúns veteranos de guerra británicos, que agora teñen máis de 90 anos, compartiron cos medios de comunicación internacionais as súas experiencias sobre un dos maiores conflitos bélicos da historia.
"Estaba aterrorizado", expresou o case centenario John Jenkins, un exsarxento de pelotón que serviu coa armada británica Royal Pioneer Corps, o día que desembarcou na coñecida en clave como Gold Beach, unha das praias da Francia ocupada polo exército de Adolf Hitler.
"Tiña 23 anos e, aínda que o medo non o exteriorizaba, podía sentilo no meu interior. Pensaba '¿Que vai pasar agora?", contou este excombatente a poucos metros do Memorial Naval antes de considerar "unha boa idea" a celebración de eventos como o
Aínda que a tarde do mércores Jenkins non subiu ao MV Boudicca, o ferry encargado pola Royal British Legion para rememorar 75 anos despois daquela travesía rumbo a Normandía, outros veteranos como Arthur Hampson, de 93 anos, a mesma idade que hoxe ten a raíña de Inglaterra, si volveron partir desde o mesmo porto que os viu afastarse en xuño de 1944.
A dous días de deixar o seu cargo como primeira ministra do Reino Unido, a conservadora Theresa May, subiu ao escenario e leu a postal que o capitán Norman Skinner, do Corpo de Servizo do Exército Real, levaba no seu peto cando aterrou en Sword Beach (Francia) o 6 de xuño de 1994. "Aínda que daría calquera cousa por volver convosco —en alusión á súa esposa e as súas dúas fillas—, aínda non quero retirarme do traballo que temos que facer aquí", citou May sobre o texto que Skinner escribiu á súa muller catro días antes de morrer.
Ao final do Día D, os aliados estableceran un punto de apoio en Francia e, en once meses, a Alemaña nazi foi derrotada, facendo que a vida e o servizo dos máis de 75.000 británicos, canadenses e demais tropas da Commonwealth, xunto ás forzas estadounidenses e as da resistencia francesa merecesen a pena.
A homenaxe a todos os homes e mulleres que fixeron historia hai máis de sete décadas durante a Segunda Guerra Mundial culminou cun desfile aéreo de avións antigos e novos que tinxiron o ceo das cores azul, branca e vermella e serviu ademais para poñer de manifesto a importancia das alianzas para asegurar no presente e no futuro a seguridade e liberdade que se garantiu no pasado.
