A Universidad Rey Juan Carlos de Madrid (URJC) atopou unha "caixa de documentación" con información relativa a varios alumnos da promoción do máster que cursou o presidente do PP, Pablo Casado.
Fontes xurídicas informaron de que o pasado venres a universidade comunicou de xeito verbal ao Xulgado de Instrución número 51 de Madrid que achara unha caixa con documentación no Instituto de Dereito Público, que dirixía o investigado Enrique Álvarez Conde, e non no Vicerreitorado de Posgraos, que era o organismo encargado de achegar a información na investigación interna da URJC.
E agora a instrutora do caso máster, Carmen Rodríguez Medel, pediu á representación legal da URJC que achegue devandita caixa á peza separada C, referente ao máster de Pablo Casado.
Fontes da universidade explicaron a Efe que se trata dunha caixa con documentación de varios alumnos que cursaron o máster no curso 2008-2009, pero na que non figura documento algún vinculado co líder do PP.
Descoñécese, polo momento, que clase de documentos son, nin a transcendencia dos mesmos ou se serán ou non reveladores para a causa, explicaron a Efe fontes xurídicas.
Este achado chega apenas dez días despois de que a propia universidade informase o xulgado de que non atopaba os catro traballos que presentou o presidente do PP, Pablo Casado.
Este achado chega apenas dez días despois de que a propia universidade informase o xulgado de que non atopaba os catro traballos de Casado
Dito escrito sinala que á URJC "non lles consta ningún documento consistente nos traballos do Sr. Casado para ser avaliado nos 20 créditos non validados, nin rastro documental que evidencie a súa achega no curso académico 2008-2009 (correo postal, electrónico ou de calquera outro modo)".
O máster de Casado na URJC segue no punto de mira pero non así os seus estudos de Dereito na Universidad Complutense de Madrid (UCM), tendo en conta que este centro decidiu arquivar o expediente da carreira cursada polo presidente do PP no Centro Cardenal Cisneros (centro privado adscrito á UCM), ao non detectar irregularidades.
Así o manifestou a Universidade tras iniciar en maio "un proceso de información previa" para revisar os estudos de Pablo Casado que aprobou no curso 2006-2007 "un total de 12 materias (seis na convocatoria ordinaria de xuño e seis na convocatoria extraordinaria de setembro)", segundo o informe da UCM.
Na caixa atópanse documentos relativos ás tres alumnas investigadas que cursaron o máster de Casado
DOCUMENTACIÓN LOCALIZADA. En concreto, na caixa atópanse documentos relativos ás tres alumnas investigadas que cursaron o máster do dirixente popular e que terán que declarar este xoves na nova rolda de comparecencias ditadas polo xuíz.
Trátase de María Mateo Feito, a filla da exasesora da Consellería de Educación María Teresa Feito, María Mateo Feito; Alida Mas Taberner que era subsecretaria da Consellería de Educación da Generalitat durante a etapa de Francisco Camps e María Dolores Cancio Álvarez, que colaborou en varias publicacións xunto ao catedrático Enrique Álvarez Conde.
