Vox fundouse cun millón de euros do exilio iraniano e o diñeiro das transferencias internacionais dos seguidores do Consello Nacional da Resistencia de Irán (CNRI) acabou nunha caixa común que serviu para abonar salarios, fianzas e alugueres desde o seu inicio, en 2013, segundo El País.
O exilio iraniano non financiou só a campaña electoral europea de Vox de 2014, senón que custeou tamén o día a día deste partido desde a súa creación ata a chegada deses comicios, de acordo coa información que publica este luns o xornal.
Gastos como a fianza e o aluguer da céntrica sede da formación na rúa Diego de León de Madrid, os salarios do persoal, o soldo do líder, Santiago Abascal -que en 2014 ocupaba o cargo de secretario xeral-, mobles e computadores correron a cargo do caudal económico estranxeiro, segundo o diario.
"O CNRI -un grupo que tivo un brazo armado que figurou ata 2012 na lista de organizacións terroristas de EE.UU. -apoiou á formación desde a súa xénese", engade o xornal.
