A iniciativa Viñetas no Camiño, proposta polo concello de Fene (A Coruña) e enmarcada no programa O Teu Xacobeo, promocionará o patrimonio turístico e o Camiño Inglés a través do debuxo. O alcalde fenés, Juventino Trigo (BNG), presentou este venres o proxecto que, segundo indicou, promocionará Fene e a comarca de Ferrolterra como culturais e turísticos, á vez que promoverá o patrimonio Xacobeo como fonte de inspiración para a creación artística contemporánea. Tamén fomentará o coñecemento do patrimonio relacionado co Camiño, particularmente entre os máis novos.
A rolda de prensa tivo lugar nas instalacións do Museo do Humor, onde o alcalde estivo acompañado pola comisaria do Xacobeo 2021, Cecilia Pereira, ademais dos edís de Cultura e Turismo deste municipio. Na súa intervención, Trigo destacou "a transversalidade desta proposta", "un proxecto de Fene e para Fene, que ademais do ámbito artístico, ao que nos se achega a través das artes visuais e escénicas, vaise a desenvolver tamén nos ámbitos deportivo e social".
AGRADECEMENTOS. O rexedor nacionalista aproveitou para agradecer "a boa disposición dos outros concellos da comarca", como son Ferrol, Narón, Neda, Cabanas e Pontedeume, "que van colaborar nalgunhas das actividades, así como o apoio da Xunta". Pola súa banda, a comisaria do Xacobeo 2021, Cecilia Pereira, felicitou ao Concello de Fene polo proxecto, xa que, segundo asegurou, "cumpre todo o que nos propuxemos cando deseñamos o programa de O teu Xacobeo".
Mentres, o edil de Cultura de Fene, Xusto Ardá, incidiu que Viñetas non Camiño ten "a súa semente" no Museo do Humor de Fene, un espazo singular e único en Galicia, que busca ser "unha sorte de caderno de viaxe ilustrada", de carácter colectivo que se irá construíndo "entre todos" para "destacar o patrimonio natural, cultural e humano do Camiño Inglés ao seu paso por Ferrolterra".
PROGRAMA. Dentro desta proposta está previsto a realización de talleres no propio Museo do Humor e centros educativos de Fene, con explicacións de técnicas básicas para debuxar escenas deste camiño a Compostela. Tamén un grupo de usuarios do Centro Ocupacional de ASPANEPS vai realizar, con materiais de refugallo, un mosaico colectivo no que se reproducirá o trazado e as distancias do Camiño Inglés en Ferrolterra. Ademais, haberá un encontro de debuxantes e unha ruta polo Camiño que ata seis artistas diferentes deixarán plasmada nas súas obras. En paralelo, no verán realizarase un ciclo de contacontos e actuacións musicais.
Toda a información sobre o proxecto e os artistas participantes pódese consultar na páxina web www.vinetasdocamino.gal, na que se irá dando conta de todas as actividades.
