A Mancomunidade de Municipios Galegos do Camiño Francés prepara un plan de sustentabilidade turística, que ten como obxectivos axudar a desestacionalizar a ruta, dar a coñecer outros recursos dos once concellos que conforman a entidade e facer un Camiño sostible.
Este tipo de plans contan cunha convocatoria de axudas desde hai dous anos e son confinanciados polas administracións central, autonómica e local. O documento está en proceso de elaboración e, unha vez finalizado, será enviado á Xunta. Se esta dálle o visto e prace, a propia entidade autonómica presentarao, a continuación, ante o Goberno central e a mancomunidade confía en que conte cunha axuda.
O plan proxecta diversas actuacións, como creación de produtos de realidade virtual, unha guía dixital ou illas verdes no Camiño de Santiago. Tamén pretende "apoiar" as economías dos municipios con campañas de mercadotecnia ou de sensibilización da ruta ou de produtos locais, segundo a Mancomunidade, que está na actualidade presidida polo Concello de Sarria.
Buscan, ademais, crear produtos turísticos cos recursos existentes nestes concellos e fomentar outro tipo de turismo, como de experiencias. Queren aproveitar a ruta xacobea para que coñezan outros recursos dos concellos, que pretenden promocionar a través de campañas de produtos locais, como os seus bens patrimoniais e a súa gastronomía. O documento, aclaran, non é un plan de obras, senón un plan de turismo sostible.
O Camiño é o principal dinamizador económico dos once municipios e a súa importancia é tal que a entidade calcula que sobre o "90%" da poboación da Mancomunidade vive do sector turístico, pois entre os negocios inclúen a hostalería e o comercio.
Recentemente a entidade tamén acordou optar aos fondos Next Generation. Na última asemblea, celebrada o pasado febreiro, tomaron esta decisión, así como manter outras reunións de traballo para ver o proxecto que presentarán co obxectivo de que redunde na promoción do Camiño Francés.
Para preparar o plan de sustentabilidade turística a Mancomunidade de Municipios Galegos do Camiño Francés levou a cabo un estudo das necesidades que perciben nos once concellos que a conforman (Pedrafita do Cebreiro, Triacastela, Samos, Sarria, Paradela, Portomarín, Monterroso, Palas de Rei, Melide, Arzúa e O Pino). Agora gustaríalles coñecer que opinan os propietarios e traballadores de negocios sobre as medidas expostas no documento.
Trátase, apuntan desde a entidade, dun plan turístico no que buscan unha colaboración público-privada, polo que o colectivo anima aos veciños a participar no encontro do próximo luns.
