A Mancomunidade de Municipios Galegos do Camiño Francés promocionará o Camiño como ruta segura a nivel nacional e internacional. Así o acordaron nun pleno deste organismo celebrado este mércores no consistorio de Samos.
Os representantes dos concellos decidiron publicitar o Camiño en feiras tanto no país como no estranxeiro, aínda que dependerá da evolución do covid-19 e as restricións, tal e como sinalou o presidente do organismo, o concelleiro samonense José Antonio García.
Buscan promocionalo como "Camiño seguro" ante a pandemia e estudan facelo en Berlín ou Londres, pero tamén en España, sobre todo en Andalucía ao ser unha das comunidades da que proceden un gran número de peregrinos, explicou o presidente, quen recalcou que variará en función da crise sanitaria.
Este foi o principal asunto abordado no pleno, no que tamén recibiron luz verde as novas contas.
A reunión deste mércores foi a última que se celebra neste período en Samos, pois a presidencia rota cada dous anos polos municipios que conforman a mancomunidade e faino de forma alfabética. Durante 2019 e 2020 encabezouna o representante samonense na entidade, José Antonio García, e os próximos dous será a quenda do Concello de Sarria.
