A Asociación de Comerciantes, Industriais, Servizos e Autónomos de Ribadeo contará con credenciais e un selo propio para os peregrinos que transiten polo Camiño do Mar, de forma que poidan gañar a Compostela á súa chegada a Santiago se elixen esa ruta xacobea.
O presidente de Acisa Ribadeo, Francisco Iriarte, anunciou que, desde este venres, a oficina deste colectivo "será punto de entrega de credenciais para os peregrinos que queiran facer o Camiño do Mar", ademais de precisar que esta é "a primeira das accións que a entidade pon en marcha" logo de presentar a súa propia marca para promocionar esta ruta xacobea.
"Se o Camiño do Mar sae de Ribadeo, Ribadeo ten que ter un punto no que dar as credenciais para que os peregrinos poidan facelo", precisou.
Por iso, "desde hoxe, ese novo punto somos nós. Ademais, entregarémoslle a unha parte dos nosos asociados un selo exclusivo de Acisa Ribadeo para que poidan selar esas credenciais a quen saian" da localidade por esa ruta xacobea ou ben pasen por ela "facendo o Camiño Norte".
Iriarte tamén quixo agradecer "á Asociación de Amigos do Camiño do Mar e ao seu presidente, Manuel Vicente", a súa disposición para chegar "a este acordo", que terá "unha importancia dobre" para a localidade, porque "Ribadeo é punto de orixe dese camiño" e "os peregrinos prepararán a súa ruta aquí", pero tamén "moitos regresarán á vila ao finalizar" a ruta xacobea.
