Novas imaxes de Marilyn Monroe espida foron descubertas máis de 50 anos despois de ser rodadas durante a filmación da película Os inadaptados (The Misfits), de 1960 e que protagonizou a icona estadounidense xunto a Clark Gable, informaron este luns medios locais. Na secuencia, que foi eliminada da versión final da cinta e que se pensou fora destruída, Monroe deixa caer a saba que cobre o seu corpo logo dunha escena romántica con Gable no que fora o primeiro espido dunha actriz estadounidense nunha longametraxe.
Máis de medio século logo de captarse, o escritor Charles Casillo revela no libro Marilyn Monroe: The Private Life of a Public Icon (Marilyn Mornoe: A vida privada dunha Icona Pública) que a cinta coas imaxes, que se consideraron demasiado atrevidas, nunca foi destruída.
A obra descobre que Frank Taylor, un dos produtores de Vidas Rebeldes, conservou as imaxes de Monroe espida, que logo pasaron a mans de Curtice Taylor, fillo do produtor. "Moitas veces, as tomas que non se usaban destruíanse. Pero Frank Taylor cría que eran tan importantes e innovadoras que as conservou", explica Curtice Taylor no libro de Casillo, que se presentará este martes.
Segundo conta Curtice, o seu pai mantivo a cinta que plasma a escena nun armario ata a súa morte en 1999. Vidas Rebeldes foi a última longametraxe tanto de Marilyn Monroe, que faleceu ao ano seguinte por unha sobredose de somníferos, como de Clark Gable, que morreu días despois de acabar a rodaxe tras un ataque ao corazón.
Ata agora, pensouse que o único espido da actriz tivera lugar na súa última cinta Something's gotta give (Alguén ten que ceder), que non chegou a completarse. As imaxes do espido de Monroe, con son, duran uns 45 segundos, conforman unha escena máis natural que a que finalmente se incluíu na versión final da película, opina Curtice Taylor. "¿Por que se taparía cunha saba unha muller que está sentada sobre unha cama, cando non hai ninguén na habitación, mentres intenta porse unha blusa ao mesmo tempo? Non ten sentido", explica o fillo do produtor.
