A recoñecida actriz galega Mabel Rivera, o director de Enterrado Rodrigo Cortés e o realizador finlandés Juho Kousmanen recibirán o Premio de Honra no transcurso do 11º Festival Internacional de Cortometrajes de Bueu (FicBueu), que se celebra do 7 ao 15 de setembro na localidade pontevedresa.
Rodrigo Cortés recibirá un dos premios honoríficos, coincidindo co espectáculo De Galicia a Hollywood, no cal o cineasta ourensán percorrerá a súa carreira guiado polo escritor Juan Gómez-Xurado e o humorista Arturo González-Campos.
Será o sábado 8 de setembro, ás 18.30 horas, no Centro Social do Mar. Entre os tres analizarán as diferenzas entre narrar en breve ou en longo, segundo os pasos do director de Concursante, Enterrado ou Blackwood, que realizou o seu primeiro curto con tan só 16 anos.
Pola súa banda, o cineasta finlandés Juho Kousmanen será entrevistado no programa radiofónico Carne Cruda, que se realizará en directo o 9 de setembro a partir das 18.00 horas no Centro Social do Mar.
As entradas para Carne Cruda e De Galicia a Hollywood xa están á venda
O director, guionista e actor obtivo cinco nomeamentos da Academia Finlandesa de Cine polo seu filme de gradación, The Painting Sellers. A súa seguinte película, The Happiest Day in the Life of Olli Mäki levou galardóns do Festival de Cannes o o premio ao Descubrimento Europeo do Ano da Academia Europea.
As entradas para Carne Cruda e De Galicia a Hollywood están á venda na www.ficbueu.com con premios cortesía de Galicia Calidade para quen se faga cunha das 50 primeiras.
Así mesmo, tamén haberá un encontro con Mabel Rivera o domingo 9 de setembro, ás 12.30 horas, no Centro Social do Mar, con entrada libre e desenvolverase a modo de entrevista, na que os asistentes tamén poderán participar.
Tras esta conversación, a homenaxeada recollerá o Premio Cinema Galego 2018 e logo proxectaranse dous curtos protagonizados por ela: Dantzariak e Ato San Nen.
