domingo. 15.12.2019 |
El tiempo
domingo. 15.12.2019
El tiempo

'O que arde' competirá polo Goya a mellor película

Oliver Laxe e os actores Amador Arias Mon e Benedicta Sánchez, en Cannes. JULIEN WARNAND (EFE)
Oliver Laxe e os actores Amador Arias Mon e Benedicta Sánchez, en Cannes. JULIEN WARNAND (EFE)
A cinta de Oliver Laxe opta a outros tres galardóns ► Tosar, nomeado a mellor actor

O que arde, de Oliver Laxe, loitará polo Goya á mellor película na 34 edición dos premios que se celebrará o próximo 25 de xaneiro en Málaga. A cinta rodada en Os Ancares optará ademais a outras tres figuras: a mellor dirección para o propio Laxe, a dirección de fotografía para Mauro Herce e a actriz revelación para Benedicta Sánchez, de 84 anos e natural do Corgo. 

Outro lucense, Luís Tosar, competirá polo galardón a mellor actor por Quien a hierro mata, película da produtora galega Vaca Films, que conta con outros dous nomeamentos: actor revelación (Enric Auquer) e mellor son. 

Ademais, o actor vigués Santi Prego competirá a mellor actor revelación polo seu papel de Francisco Franco en Mientras dure la guerra. E o tamén lucense David Fidalgo Omil está nominado a mellor curtametraxe de animación por Homomaquia, unha denuncia ao maltrato animal.

Mentres dure a guerra de Alejandro Amenábar lidera os nomeamentos, cun total de 17; písanlle os talóns Dor e gloria de Pedro Almodóvar, con 16 nomeamentos, e A trincheira infinita de Jose Mari Goenaga, Jon Garaño e Aitor Arregi, con 15. 

Xunto a estas tres películas con máis nomeamentos e O que arde, de Laxe, Intemperie, de Benito Zambrano, loitará tamén por facerse polo premio á mellor película.

Os intérpretes Elena Anaya e Miguel Herrán foron os encargados de desvelar a lista de finalistas nas 28 categorías nun acto celebrado na sede da Academia de Cine. 

► Vexa aquí todos os nomeamentos

Unha película para a historia
O pasado mes de maio, Oliver Laxe xa fixo historia ao converterse no primeiro cineasta español, xunto a Víctor Erice, en ser seleccionado en Cannes coas seus tres primeiras obras e o único en ser premiado en todas as súas participacións. 

No certame, O que arde fíxose co Premio do Xurado da Sección Oficial Un Certain Regard e o Premio á Mellor Creación Sonora da sección.

Ademais, o seu filme converteuse na película en galego máis vista de sempre, tras superar a Sempre Xonxa.

'O que arde' competirá polo Goya a mellor película
Comentarios