A Asociación Mulleres Deportistas Galegas (Mudega) convocou os VII Premios ao Deporte Feminino de Galicia e abriu o prazo para a presentación de candidaturas para as mellores deportistas, técnicas, entidades, árbitras, equipos e clubs do pasado ano 2018.
Os galardóns pretenden lograr a visibilidade do deporte feminino e que os seus éxitos teñan o mesmo recoñecemento que os masculinos.
O prazo de recepción de candidaturas está aberto desde este luns ata o próximo 7 de abril e poden ser presentadas por federacións, concellos ou outras institucións, medios de comunicación, clubs e persoas a nivel particular.
Os trece premios convocados por Mudega, correspondentes ao ano 2018, son: mellor deportista feminina, mellor deportista feminina con discapacidade, mellor deportista feminina promesa, mellor adestrador do deporte feminino, mellor equipo feminino, premio á traxectoria, mellor árbitra ou xuíza, mellor directivo (máis comprometido co desenvolvemento do deporte feminino, mellor club, medio de comunicación/xornalista amigo do deporte feminino, institución pública amiga do deporte feminino, entidade privada máis colaboradora co deporte feminino, e mellor iniciativa a favor do deporte feminino).
