A española Carolina Marín, vixente campioa olímpica, mundial e europea de bádminton, rompeu o ligamento cruzado anterior do xeonllo dereito no transcurso da final do Masters de Indonesia e deberá pasar polo quirófano, segundo informou este luns o seu gabinete de prensa.
Marín lesionouse este domingo no partido que a mediu coa india Saina Nehwal polo título en Iacarta.
Na xogada do 9-2, Carolina Marín rompeu o ligamento cruzado anterior do xeonllo dereito. Intentou continuar no choque, pero retirouse cun favorable 10-4.
Este luns, ao seu regreso a España, pasou unha revisión médica que determinou o alcance da lesión. Será operada nunha data por determinar.
