O presidente do Celta de Vigo, Carlos Mouriño, desvelou este xoves que o club rexeitou unha oferta do Atlético de Madrid polo lateral Jonny Otto, descartou a posibilidade de que o danés Daniel Wass amplíe o seu contrato -finaliza o 30 de xuño de 2019- e asegurou que o internacional español Iago Aspas "só sairá se pagan a súa cláusula de rescisión".
"A única oferta que recibimos por algún dos nosos xogadores foi a do Atlético de Madrid por Jonny e rexeitámola. Esa é a única oferta que tivemos real, directamente de club a club", manifestou o máximo accionista do club vigués durante a súa comparecencia ante os xornalistas.
Mouriño avanzou que o Celta baralla realizar "entre catro ou cinco fichaxes", e que o desexo da dirección deportiva e o técnico Antonio Mohamed é reforzar "a liña defensiva e o centro do campo".
"A Wass decidimos rotundamente non renovalo. Baixo ningún concepto imos ofrecerlle tres ou catro anos de contrato. Se queda, aproveitarémolo este ano; e se se marcha non nos crea un gran problema porque temos xogadores que poden substituílo", puntualizou.
Afirmou que, en principio, o extremo turco Emre Mor, quen esta pasada tempada foi apartado dúas veces do grupo por Juan Carlos Unzué, terá "outra oportunidade" en Balaídos: "Ten que corrixir algunhas actitudes pero é un xogador fantástico e totalmente válido".
O presidente tamén dixo que o dianteiro Borja Iglesias, cedido este curso ao Real Zaragoza, co que está a disputar a fase de ascenso á liga Santander, realizará a pretempada co Celta e despois decidirán o seu futuro. "Borja ten un ano máis de contrato connosco e conxuntamente con el decidiremos que é o mellor para as dúas partes. Pero todos os xogadores que mostren compromiso co Celta, e o caso de Borja é moi claro, terán a nosa maior compresión tanto para quedar como para irse", subliñou.
Mouriño reiterou que ao Celta élle "tremendamente difícil" fichar xogadores "contrastados" polo que seguirán apostando pola canteira e xogadores novos que busquen revalorizarse en Vigo. "A nosa prioridade seguirá sendo non romper o equilibrio salarial existente no persoal, non podemos hipotecarnos por ningún xogador", avisou o dirixente céltico, quen reiterou que prefire "dez anos en Primeira División que un xogando a Copa da Uefa".
