A selección española feminina de hockey sobre herba derrotou este domingo no partido polo bronce á de Australia por 3-1 para lograr en Londres a súa primeira medalla nun Mundial.
O equipo de Adrian Lock, que o sábado quedou fóra do partido polo título ao perder ante Irlanda nos 'shootouts', impúxose con solvencia á bicampioa Australia na final de consolación. María López adiantou a España de penalti-córner no minuto 11 e só tres máis tarde Berta Bonastre anotou o 2-0.
Kathryn Slattery acurtou distancias para as 'aussies' no 40, pero Alicia Magaz marcou o definitivo 3-1 no 51 para selar o bronce para España.
PRIMEIRA MEDALLA NUN MUNDIAL. A deste domingo é a primeira medalla mundialista feminina para España, que mellora a súa ata agora mellor resultado, o cuarto lugar conseguido en 2006 en Madrid.
Na final, Holanda goleou 6-0 a Irlanda para sumar o seu oitavo título e segundo consecutivo.
Lidewij Welten, Kelly Jonker, Kitty van Male, Malou Pheninckx, Marloes Keetels e Caia van Maasakker selaron a contundente vitoria holandesa.
Holanda une este título aos conseguidos previamente en 1974, 1978, 1983, 1986, 1990, 2006 e 2014. Irlanda logra o seu primeiro metal nunha Copa do Mundo feminina.
