Abanca inaugura este mércores a súa nova sede na Coruña tras un proceso de reforma que o presidente da entidade, Juan Carlos Escotet, enmarca nunha nova cultura baseada na tecnoloxía, a apertura de espazos e a sustentabilidade para poder tratar ao cliente "como alguén realmente único".
O presidente, acompañado polo conselleiro delegado de Abanca, Francisco Botas, presentou aos medios de comunicación esta nova oficina principal e sede corporativa na capital herculina, situada na Rúa Nova, 30. A entidade emprenderá ata o próximo ano a transformación de 75.000 metros cadrados, coa reforma e integración de case 300 oficinas, e un investimento aproximado de entre 50 e 75 millóns de euros.
Trátase dun "compromiso máis" de Abanca con Galicia, co que quere demostrar que se poden realizar actividades innovadoras, próximas ao cliente e desde aquí "expandilas" ao resto do territorio, explicou Botas.
As instalacións presentadas este mércores pola mañá "non son simplemente o resultado dunha reforma, senón de algo moito máis profundo, dunha nova forma de facer banca" coa que a entidade con sede en Galicia está "a revolucionar a atención e servizo a clientes e a forma de traballar do equipo", subliñou Escotet. En definitiva, esta "renovación" non é puntual senón que forma parte dunha nova fase en proceso de transformación que Abanca emprendeu nos últimos anos "moi intensos e positivos" para a entidade.
O primeiro paso deuno a redefinición do seu modelo de atención e servizo ao cliente, baseado no coñecemento das súas necesidades, seguido da especialización como elemento crave do modelo de negocio, ao contar con máis de 2.400 xestores especializados no seu persoal, e a creación de divisións que atenden a colectivos de clientes e segmentos de negocio con necesidades diferenciadas.
Engloba todo iso un "gran cambio cultural", detallou Escotet, no que os traballadores interiorizaron unha nova forma de traballar "máis innovadora, flexible e colaborativa", presente en toda a organización, áreas e niveis xerárquicos.
O marco de todo este proceso de transformación integral pódese visualizar nas novas oficinas de Abanca, que empezaron a redefinir o seu papel para atender os hábitos e necesidades do cliente que van cambiando e nas que a tecnoloxía ten un papel importante. Así, a entidade que preside Juan Carlos Escotet está a converter as súas oficinas en espazos máis abertos e transparentes, flexibles, potentes funcionalmente, sostibles e cun alto nivel estético e de confort "para garantir unha experiencia positiva" do cliente.
Deste xeito, a transformación das instalacións de Abanca consiste nunha redefinición intelixente de espazos combinada coa potenciación das capacidades tecnolóxicas e o aforro no uso de recursos. "O noso modelo é un espazo aberto, con máis tecnoloxía e máis sustentabilidade, coas persoas no centro de todo o que facemos", resumiu Escotet.
Pola súa banda, Francisco Botas precisou que se eliminaron a maioría de computadores de mesa porque priman as tabletas, que favorecen a mobilidade e axilidade na relación co cliente; e potenciáronse as telecomunicacións, con sistemas avanzados de wifi, videoconferencias ou audio.
Este edificio na Coruña, no que traballan medio milleiro de persoas, conta cun sistema de climatización baseada en sensores en función da ocupación, polo que a sustentabilidade é outra das premisas fundamentais nesta renovación da sede corporativa da entidade. Ademais da oficina de atención ao público na parte baixa desta sede, o resto de plantas contan con salas de reunións e creativas, decoradas con mostras da colección de arte de Abanca, así como de traballo, con nomes das illas onde a entidade está presente, cafetería ou biblioteca.
