Carrefour premiou a Aceites Abril como a mellor peme agroalimentaria de Galicia, grazas aos votos dos propios clientes da cadea, que foron quen decidiron, entre as 69 empresas candidatas, que o premio recaese na compañía ourensá.
O acto de entrega do premio tivo lugar no hotel Los Reyes Católicos de Santiago de Compostela, no cal se citaron os directivos das principais empresas de alimentación de Galicia e que foi presidido polo conselleiro de Medio Rural José González Vázquez.
A encargada de recoller o premio por parte de Aceites Abril foi Elena Pérez Canal, directora de mercadotecnia da compañía, quen destacou no seu discurso as claves que posibilitaron que Aceites Abril estea hoxe onde está, á vez que agradeceu a consumidores e ao propio Carrefour a entrega do premio e a súa fidelidade todos estes anos.
Tratouse dun acto cargado de emotividade, debido ao recente falecemento do seu irmán José Manuel quen exerceu de xerente da compañía durante máis de 20 anos, e a quen a súa irmá Elena quixo recordar e homenaxear como se merece destacando que "o noso capitán velará desde arriba para que o rumbo sexa constante e dirixido".
