O Ministerio de Traballo, Migracións e Seguridade Social publicou unha guía sobre o rexistro de xornada para facilitar a aplicación práctica da norma en relación con este deber empresarial.
Así, o documento recolle que o rexistro horario aplícase á totalidade de traballadores, á marxe da súa categoría ou grupo profesional, a todos os sectores de actividade e todas as empresas, "calquera que sexa o seu tamaño ou organización de traballo", sempre que estean incluídas no artigo 1 do Estatuto dos Traballadores.
"As empresas quedan obrigadas ao rexistro diario de xornada tamén respecto de traballadores móbiles, comerciais, temporais, traballadores a distancia ou calquera outras situacións nas que a prestación laboral non se desenvolve, total ou parcialmente, no centro de traballo da empresa", apunta a guía.
No entanto, como excepción recolle que estarán excluídos de 'fichar' o persoal de alta dirección, pero non os traballadores que non sendo estritamente persoal de alta dirección, son mandos intermedios, cargos de confianza ou con exercicio de especiais responsabilidades, aínda que teñan pactado un réxime de libre dispoñibilidade do tempo de traballo ou forme parte das súas obrigacións contractuais a súa plena disposición horaria para o cumprimento da súa actividade profesional.
Neste caso, Traballo cre que tamén poden producirse situacións de abuso de dereito e por iso, asegura que si se deberá realizar un rexistro da xornada, pero "sen prexuízo da acreditación do seu tempo de traballo mediante o pacto de dispoñibilidade horaria". Para o Ministerio, interprétase que a retribución obtida polo traballador por esta dispoñibilidade horaria xa compensa de xeito "proporcionado" esa maior esixencia de tempo de traballo.
Con todo, asegura que a través da negociación colectiva ou a través dun acordo coa empresa débese deixar constancia de tal circunstancia para "evitar situacións abusivas ou desproporcionadas".
Tampouco terán que rexistrar a súa xornada, agás se a súa normativa específica indica o contrario, os deportistas profesionais, os artistas en espectáculos públicos, o persoal de servizo doméstico ou os avogados que prestan servizos en despachos de avogados, entre outros.
Nesta liña, establece que non existirá tampouco obrigación de rexistro horario no caso das relacións de traballo que estean excluídas do Estatuto dos Traballadores, como son os socios de cooperativas ou os traballadores autónomos.
