O comité de dirección de BBVA en España puxo fin este mércores a dous días de reunión na Coruña. A cita serviu para facer balance do ano —cun beneficio de 2.110 millóns ata setembro, un 62% máis — e para abordar a estratexia de face a 2024.
Co ‘country manager', Peio Belausteguigoitia, á fronte, os directivos repasaron as perspectivas macroeconómicas de Galicia e a marcha do negocio na comunidade, onde a cota supera o 12% e a captación de clientes aumentou un 14%.
Belausteguigoitia marcou as prioridades para o próximo exercicio: o apoio a familias, empresas e ao emprendemento; a innovación; o crecemento "rendible e sostible"; sumar e vincular clientes e fomentar a "saúde financeira".
As proxeccións de BBVA apuntan que a economía galega expandirase un 2,1% en 2024, tres décimas máis que a media española.
Na reunión do comité directivo participou José García Casteleiro, o novo director de banca de empresas, corporacións e CIB tras máis de 28 anos de traxectoria na entidade financeira.
