Ecoener reuniu este venres en A Coruña á súa xunta xeral de accionistas, que deu luz verde ás contas de 2022, un exercicio no que o grupo gañou 20,2 millóns de euros tras multiplicar case por catro os 5,6 millóns do exercicio anterior. Isto foi posible despois de que os ingresos da enerxética galega despuntasen un 83%, ata os 72,9 millóns, o que contribuíu a situar o resultado bruto de explotación (Ebitda) en 44,1 millóns (+96%). Con estas vimbias, a marxe neta foi do 28%.
Cun fluxo de caixa de 52,5 millóns, o triplo que en 2021, a compañía investiu 121,2 millóns en activos o ano pasado.
Durante a reunión, o presidente e fundador, Luís de Valdivia, destacou "a solidez e estabilidade" da estratexia de Ecoener e describiu 2022 como "un exercicio de crecemento e consolidación". O empresario con raíces lucenses avanzou que a previsión é pechar 2023 cunha conta de resultados aínda mellor.
Actualmente, Ecoener ten en operación e construción 422 megawatts (MW) en centrais hidroeléctricas, parques eólicos e plantas solares fotovoltaicas. Da carteira total, 190 MW están implantados en España, en tanto que o resto está repartido por América.
Na cita deste venres, os accionistas tamén deron luz verde ao nomeamento da exconselleira de Facenda da Xunta Marta Fernández Currás como conselleira independente. O obxectivo é que reforce o bo goberno corporativo.
