O paro baixa en Galicia en 2.412 persoas mentres medra en España

O número de parados rexistrados nas oficinas dos servizos públicos de emprego (antigo Inem) baixou en Galicia en agosto en 2.412 persoas (un 1,23%) en relación co mes anterior, fronte ao aumento rexistrado no conxunto estatal (14.435 desempregados máis), segundo os datos que publica este venres o Ministerio de Emprego e Seguridade Social.

En relación con agosto de 2015, a comunidade galega conta con 20.687 persoas menos en paro, o que supón un descenso do 9,68%, ata situar o total en 193.045 desempregados. En termos relativos, trátase do segundo maior descenso en variación mensual (só por detrás da caída do 3,38% na Rioxa) e do oitavo maior en evolución anual.

En agosto, as catro provincias galegas rexistraron descensos na cifra de parados tanto respecto de xullo como en comparación co mesmo período do ano anterior. En concreto, as maiores caídas intermensual e interanual en termos relativos déronse en Lugo (-2,54% e -10,65%, respectivamente).

Os demandantes de emprego en Galicia o oitavo mes do ano alcanzaron os 253.365, dos que 28.443 estaban ocupados, 17.590 indicaban na súa solicitude condiciones especiais de traballo e os 207.332 restantes eran non ocupados. Estes últimos son 3.074 menos que os que se contabilizaron en xullo (-1,46%) e 23.274 menos que o mesmo mes do anterior exercicio (-10,09%).


CONTRATOS. A contratación, no entanto, retrocedeu en agosto en Galicia en 11.978 firmas en relación con xullo (-12,04%), aínda que se subiu respecto ao mesmo mes de 2015, en 11.545 rúbricas (+15,2%). Por tipo, a gran maioría, 82.540 son temporais, mentres que 4.969 son indefinidos –2.050 deles, de conversión–. Caeron en variación mensual nas catro provincias, sobre todo en Pontevedra en termos relativos (-14,47%), e incrementáronse en todas en relación con agosto do ano pasado (sobre todo en Pontevedra tamén, cun 17,57% máis).

Os contratos indefinidos descenderon en 1.011 en comparación con xullo (un 16,91%), fronte ao crecemento interanual, con 1.087 documentos máis (+28%). Os temporais baixaron en 10.967 respecto ao mes anterior (-11,73%), pero subiron en 10.458 en 12 meses (+14,51%). Así as cousas, no acumulado, os contratos alcanzan os 616.463 na comunidade galega, 570.020 deles temporais (o 92,47% do total) e 46.443 indefinidos (o 7,53%).

DATOS ESTATAIS. No conxunto estatal, o número de parados rexistrados nas oficinas dos servizos públicos de emprego (antigo Inem) subiu en agosto en 14.435 persoas en relación co mes anterior, co que acaba cunha sucesión de cinco meses consecutivos á baixa.

Desta forma, a cifra total de parados rexistrados sitúase en 3.697.496 persoas, a menor cifra rexistrada nun mes de agosto desde 2009, segundo informou este venres o Ministerio de Emprego e Seguridade Social. Este incremento do paro en agosto é inferior ao rexistrado o mesmo mes do ano pasado (21.679 persoas) e á media dos últimos oito anos (46.029 persoas).

Cos últimos compases do verán, agosto é tradicionalmente un mal mes para o emprego. En todos os meses de agosto desde 2001 aumentou o paro rexistrado, salvo en 2013, cando se reduciu en 31 persoas. Emprego resaltou que, en termos desestacionalizados, o paro baixou en agosto en 26.462 persoas.