Norvento Enerxía volve ampliar as placas fotovoltaicas coas que conta MB92 Barcelona, un estaleiro líder no Mediterráneo na reparación, reacondicionamiento e mantemento de superiates fundado en 1990. Nun comunicado, a compañía lucense de renovables explicou este martes que despregou unha instalación de 129 kWp en dúas naves.
O proxecto arrincou en 2021 coa montaxe das primeiras placas fotovoltaicas no porto de Barcelona por parte de Norvento. Con esta ampliación, MB92 poderá cubrir unha maior demanda enerxética con fontes renovables despregadas nas súas cubertas. A empresa catalá —cuxa actividade está enfocada nos superiates con esloras que oscilan entre os 30 e os 180 metros— está a investir no reacondicionamiento e optimización da súa tecnoloxía e as súas instalacións. O seu obxectivo é "minimizar" o impacto do estaleiro dentro do seu compromiso coa Axenda 2030 de Nacións Unidas.
A compañía catalá destaca os "notables avances" realizados nos últimos anos na estratexia de descarbonización coa redución do uso de combustibles fósiles e a electrificación dos seus peiraos, con capacidade para atracar 14 barcos para reparar. A isto súmase o cambio de calefactores diésel por sistemas de aerotermia nos proxectos de pintura. MB92 encárgase cada ano de reacondicionar e arranxar ao redor dun centenar de superiates no porto de Barcelona, que é punto de paso entre o Mediterráneo e o Caribe.
"Tanto a electrificación de peiraos como a instalación de fontes de enerxía renovable son proxectos nos que tamén estamos a traballar e que pronto veremos frutificar noutros puntos do recinto portuario", avanzou Lluís Salvadó, presidente do Port de Barcelona.
O autoconsumo crece na industria coa firma lucense
Norvento afiánzase como compañía especializada en brindar solucións tecnolóxicas á industria para implantar o autoconsumo e reducir así a factura enerxética. A xeración fotovoltaica, a eólica, o biogás e o despregamento de sistemas de almacenamento en baterías son a súa especialidade. A firma lucense traballa en instalacións conectadas á rede e nas independentes e os seus servizos esténdense ás áreas de consultoría e enxeñería.
Con 42 anos de traxectoria, Norvento fabrica e vende tecnoloxía propia como a súa aeroxerador de media potencia nED100 e sistemas de almacenamento eléctrico con baterías modulares.
