O presidente de Abanca, Juan Carlos Escotet, reivindicou este xoves "o papel decisivo" da banca á hora de asegurar "o fluxo de crédito, apoiar o investimento empresarial e impulsar novas infraestruturas". Convencido de que, a resultas da reestruturación que seguiu á crise de 2008, España conta hoxe cunha "das bancas máis sólidas de Europa", o principal accionista da entidade (84,75%) puxo en valor que Abanca foi un dos signatarios fundadores en 2019 dos Principios de Banca Responsable que impulsou a Onu.
Foi durante o foro Diálogos co sector bancario para o progreso económico e social, organizado coas patronais AEB, Ceca e Unacc, en colaboración coa Presidencia española da UE coincidindo coa celebración da reunión informal do Ecofin en Santiago.
Entre os retos do sector, Escotet mencionou a sustentabilidade e a transformación dixital. Nun escenario no que a banca debe "canalizar os fluxos de capital" cara a unha economía "máis sostible" e "descarbonizar" a súa carteira de clientes a través do crédito, Escotet avisou do risco de que "o titánico reto" da transición verde "descanse demasiado no papel da banca". "Preocúpame que nos atopemos cunha axenda moi esixente para os bancos que non se vexa correspondida nin polas esixencias nin pola información dispoñible por parte das nosas empresas clientes", manifestou.
Respecto da dixitalización, chamou a evitar a exclusión financeira. Neste punto, destacou que, a pesar de ser "a comunidade con maior dispersión" xeográfica, Galicia ten "a maior accesibilidade" aos servizos bancarios dado que o 98% dos concellos teñen acceso ao diñeiro en efectivo. Atribuíuno ao "esforzo" de Abanca por seguir operando en 177 municipios que "o resto" de competidores abandonaron.
No evento, que congregou a unha nutrida representación das finanzas e o mundo empresarial e que clausurou a vicepresidenta primeira e ministra en funcións de Asuntos Económicos, Nadia Calviño, o presidente da Xunta reivindicou o papel da banca no crecemento e recalcou que os empresarios "non son inimigos, senón aliados" para procurar o progreso económico e social.
Fronte á "inestabilidade política" a nivel nacional, Rueda defendeu a súa receita de estabilidade "e confianza" e incidiu en que a súa intención é aprobar os orzamentos para 2024 "en tempo e forma", a pesar de que o Ministerio de Facenda non comunicou nin o teito de gasto, nin o obxectivo de déficit, nin as entregas a conta. O pontevedrés tamén anticipou que a economía galega cumprirá o obxectivo de crecemento do 1,9% este ano, "cun lixeiro superávit".
Ante a necesidade de insuflar liquidez para que o PIB siga expandíndose, Rueda chamou a Sánchez a desbloquear "os fondos Next Generation canto antes". Con proxectos tractores como o de Altri en Palas en standby, avisou de que hai iniciativas "maduras que levan demasiado tempo esperando". E ademais de criticar a centralización da xestión, avisou de que o tempo se acaba" do mesmo xeito que "a paciencia dalgúns investidores".
Entre os numerosos relatores do foro, o presidente do Banco Central de Uruguay (BCU), Diego Labat, expresou o seu desexo de que a reunión informal de ministros do Ecofin cos seus homólogos de Latinoamérica e o Caribe sirva para "xerar canles de comercio" e que cristalice o financiamento dalgúns proxectos alén do charco por parte da banca europea.
Acompañado polo lucense José María Méndez, o director xeral da Ceca, e por Francisco Serrano Gil de Albornoz, o presidente de Ibercaja, Labat explicou como desde que asumiu o cargo en marzo de 2020, e tras optar por unha política monetaria laxa para apoiar a particulares e empresas na pandemia, o regulador comezou a subir os tipos a mediados de 2021 para combater a inflación, que se estabilizou no 8% e que nos 60 chegou a superar os tres díxitos. "Hoxe estamos no 4%, que para o estándar europeo é alta, pero para nós é a máis baixa en 18 anos", destacou o líder do BCU, que xa aplicou tres reducións de tipos ao controlar os prezos.
