O ano 2015 pechouse cun aumento de 3.650 parados en Galicia no mes de decembro (+1,62%), quedando a cifra total en 228.808 desempregados. Pese ao mal resultado do último mes do ano, a comunidade rexistrou un descenso de 23.110 en todo 2015 (-9,17%), segundo os datos publicados este martes polo Ministerio de Empleo e Seguridad Social.
En España, o ano pechou con 4.093.508 parados rexistrados, 354.203 menos que en 2014 (-7,96%), o que supón o terceiro descenso anual consecutivo e o maior de toda a serie histórica que comezou en 1996.
En decembro, no conxunto de España saíron das listas do paro 55.790 persoas das listas do paro. En 13 comunidades baixou, entre as que destacan Andalucía (-27.066), Madrid (-9.284) e Cataluña (-5.992). Sobe, en cambio, nas catro restantes, encabezadas por Galicia (3.650) e Navarra (1.197).
SITUACIÓN POR PROVINCIAS. Por provincias e en decembro, o desemprego rexistrado reduciuse en 38, entre as que destacan Madrid (9.284), Xaén (7.731) e Barcelona (5.072). Mentres, aumentou nas outras 14, encabezadas pola Coruña (1.731) e Pontevedra (1.466).
Das galegas, Pontevedra é a que ten un maior número de parados actualmente, cun total de 90.962, seguida da Coruña con 89.920; Ourense, con 25.230 e Lugo con 22.696.
No caso da provincia da Coruña, supón, en relación ao mes de novembro, 1.731 parados máis (un 1,96% máis), fronte a un descenso de 9.313 en relación ao ano anterior (-9,38%).
O mesmo ocorre nas demais provincias galegas, cun aumento de parados en relación ao mes anterior e cun descenso se se compara cos datos de 2014. Así, en Lugo rexistráronse en decembro 305 parados máis, un 1,36% máis que en novembro; en Ourense, 148 desempregados máis, un 0,59%, e en Pontevedra, 1.466 parados máis, un incremento do 1,64%.
Con respecto ao ano anterior, en Lugo hai 2.247 desempregados menos (-9,01%); en Ourense, o descenso é de 2.084 parados (-7,03%); e en Pontevedra, de 9.466 persoas (-9,43%).
