A Corporación Hijos de Rivera súmase ao movemento B Corp, unha comunidade empresarial e de persoas implicadas en resolver problemas sociais, coidar o medio ambiente, fortalecer as comunidades e crear empregos de calidade "con dignidade e propósito".
A compañía familiar —propietaria de Estrella Galicia, Cabreiroá, Maeloc, Auara, Ponte da Boga ou o museo Mega— entra así a formar parte dun club no que están 8.000 empresas de 95 países e 162 industrias diferentes. A corporación súmase a outras compañías do talle de Danone, Patagonia, Ecoalf ou Ben&Jerry's. Este movemento aspira a transformar a economía mundial para camiñar cara a un modelo "máis xusto, inclusivo e sostible".
Para recibir o selo B Corp, Hijos de Rivera acreditou o cumprimento de altos estándares en materia de desempeño social e ambiental, transparencia e responsabilidade empresarial.
"Sumámonos ao movemento B Corp con enorme ilusión e respecto", afirma Ignacio Rivera, o presidente executivo, que se reuniu con Belén Viloria, directora executiva de B Lab Spain, a organización encargada de certificar as compañías españolas que lideran a transformación cara á novo paradigma económico. A comunidade española supera as 250 firmas, que suman máis de 23.500 traballadores. A compañía con sede no polígono da Grela obtivo unha puntuación total de 88,2 puntos, por enriba dos 80 requiridos para ser B Corp.
O primeiro espada de Hijos de Rivera atribúe o logro de entrar neste grupo a unha "fazaña colectiva de todos os inconformistas" que integran a corporación. Ademais, recalca que o selo B Corp supón un revulsivo para "seguir mellorando" e reivindicando a aposta "polo impacto positivo como un alicerce estratéxico para xerar valor compartido". "Levamos máis dun século sen baixar os brazos, pensando en como coidar o produto, pero tamén como coidar a nosa xente. E o lugar onde nacemos. E o planeta onde vivimos. é unha forma de ser, unha elección de vida", recalca o coruñés, que pilota un equipo integrado por máis de 1.800 traballadores.
"Somos testemuñas do esforzo, traballo e compromiso que Hijos de Rivera dedicou para alcanzar este logro tan importante", remarcou, do seu lado, Belén Viloria, confiada en que o exemplo da compañía galega "inspire moitas outras empresas e persoas" no sector e na comunidade.
Entre os retos que a corporación encara este ano está a inauguración da que será a súa segunda fábrica, no polígono de Morás, en Arteixo, unhas instalacións que estarán "á vangarda do sector en termos de benestar e respecto á contorna".
