O Goberno aprobou o primeiro tramo de avais públicos por 20.000 millóns de euros para garantir que as entidades financeiras outorguen a liquidez necesaria a empresas e a autónomos que se viron afectados polo impacto da crise sanitaria ocasionada pola expansión do coronavirus. Este primeiro tramo de avais, que forma parte dunha liña cun importe total de 100.000 millóns de euros que será xestionada polo Instituto Oficial de Crédito (ICO), cubrirá o 80% de novos préstamos e renovacións para autónomos e pemes; o 70% de novos préstamos para o resto de compañías e o 60% nas renovacións que realicen estas últimas.
"Damos así cumprimento ao compromiso que temos coas empresas, os traballadores autónomos e as pemes, pondo en marcha un sistema de liquidez que preserve a actividade produtiva e o emprego", indicou a portavoz do Executivo, María Jesús Montero, na rolda de prensa posterior ao Consello de Ministros.
Esta medida terá carácter retroactivo desde o pasado 18 de marzo, cando se declarou o estado de alarma, de forma que se garantirá a concesión de novos préstamos e todas as renovacións cunha vixencia igual ao prazo concedido pola entidade financeira e un máximo de 5 anos.
Montero: "A sociedade quere que o conxunto dos responsables políticos mostren unidade"
Montero explicou que esta liña de liquidez servirá para que os empresarios atendan as súas necesidades de financiamento como os pagos de salarios, de facturas, necesidades circulantes, ou outras como os vencementos de obrigacións financeiras ou tributarias.
PRÓRROGA DO ESTADO DE ALARMA
Doutra banda, o Goberno acordou este martes pedir ao Congreso que autorice a ampliación do estado de alarma ata o 11 de abril, nas mesmas condicións que rexe actualmente. Ata as 00.00 horas do 11 de abril durará a prórroga pola que avoga o Executivo, de acordo coas recomendacións e o criterio das autoridades sanitarias e dos expertos, remarcou Montero.
"Somos conscientes das inquietudes e desazón que xera o confinamento para as familias, pero as autoridades sanitarias e os expertos coinciden en que é unha medida efectiva"
As condicións do estado de alarma xa declarado polo Goberno, mediante decreto lei aprobado o pasado 14 de marzo, serán as mesmas mentres dure a prórroga. A ministra de Facenda recoñeceu a "dureza" dunha medida que mañá debaterá e votará o Congreso. O pleno para iso está convocado.
"O Goberno espera contar co apoio de todas as forzas parlamentarias", afirmou Montero antes de recalcar que "a sociedade quere que o conxunto dos responsables políticos" mostren unidade. Se é avalada a prórroga pola Cámara, o Goberno volverá reunir ao Consello de Ministros, en sesión extraordinaria, o venres que vén para que entre en vigor
A portavoz do Goberno engadiu: "Somos conscientes das inquietudes e desazón que xera o confinamento para as familias, pero as autoridades sanitarias e os expertos coinciden en que é unha medida efectiva" para alcanzar o primeiro obxectivo: aplanar a curva de contagios e que logo vaia descendendo
