O presidente do Goberno, Pedro Sánchez, anunciou que o Consello de Ministros do próximo venres, 21 de decembro, aprobará a subida salarial para os empregados públicos que o Executivo do PP pactou cos sindicatos para 2019.
Durante a súa comparecencia no Senado, Sánchez recordou que este acordo implica unha subida salarial fixa para 2019 do 2,25%, á que podería sumarse outra parte variable (0,25%) ligada á evolución do PIB e outro 0,25% procedente de fondos adicionais.
En total, nun escenario de máximos, a subida salarial podería alcanzar o 2,75%, aínda que para iso o PIB tería que crecer un 2,5% e a previsión é que o faga un 2,3%.
A ministra de Política Territorial e Función Pública, Meritxell Batet, xa asegurara onte que o Goberno ía cumprir co acordo retributivo para 2019, subindo os salarios dos empregados públicos desde o 1 de xaneiro.
O que non aclarara Batet é se esta subida faríase por Real Decreto antes de que finalizase o ano ou se se faría a posteriori (con efectos retroactivos se era recollida en Orzamentos). Finalmente, farase por Real Decreto, tal e como demandaban as organizacións sindicais, que non querían esperar a ver que pasaba cos Orzamentos de 2019.
SUBIDA DO SMI. O Consello de Ministros do venres, que se celebrará en Barcelona, tamén aprobará a subida do salario mínimo interprofesional (SMI) para 2019 ata os 900 euros mensuais, cifra un 22% superior aos 735,9 euros ao mes de 2018, segundo reiterou Sánchez na súa comparecencia deste martes no Senado para facer balance dos seus seis meses á fronte do Goberno.
Este incremento do SMI é froito do acordo que alcanzou o Executivo con Unidos Podemos para os Orzamentos Xerais do Estado de 2019 e, segundo destacou Sánchez, trátase dun incremento que "impugna a depreciación salarial" sufrida nos últimos anos como consecuencia da reforma laboral de 2012, realizada polo Goberno do PP.
A contía do salario mínimo apróbase habitualmente por decreto a finais de decembro, para a súa entrada en vigor o 1 de xaneiro do ano seguinte.