O grupo industrial Riesgo adquiriu a maior parte do paquete accionarial de Alu Ibérica, a nova propietaria das antigas plantas de Alcoa na Coruña e Avilés, co obxectivo de impulsar a actividade destas instalacións industriais.
Nun comunicado, Alu Ibérica sinala que Parter Capital, o fondo de investimento suízo que adquiriu estas plantas a Alcoa para asegurar o futuro da súa actividade tras a retirada da multinacional estadounidense produtora de aluminio, decidiu integrar ao grupo Riesgo como socio "estratéxico". Esta entrada no capital levouse a cabo a través do seu vehículo de investimento System Capital Management, coa intención de elaborar un novo plan de desenvolvemento a longo prazo, que inclúe accións inmediatas no campo dos investimentos que necesitan estas plantas de produción.
"Grupo Industrial Riesgo posúe unha probada experiencia en xestión empresarial e está altamente capacitado no sector industrial, no que acometeu con éxito importantes proxectos, o que lle avala para afrontar e superar o difícil momento que está a atravesar Alu Ibérica", defende o grupo.
O grupo Riesgo buscará reindustrializar as dúas plantas
EMPREGO. A idea deste conglomerado de empresas é reindustrializar ambas as plantas, asegurando que o seu obxectivo é garantir o mantemento de todos os postos de traballo, tanto en Galicia como en Asturias, sobre todo ante a actual situación xerada pola crise do coronavirus.
A finais do pasado mes de marzo, o grupo decidiu paralizar a súa produción de aluminio nestas instalacións, en resposta ao decreto aprobado polo Goberno que ordena o peche de toda actividade non esencial para evitar a propagación do coronavirus. No entanto, Alu Ibérica retomou o pasado venres a actividade para volver operar con normalidade, aínda que "seguindo un estrito protocolo de prevención e minimizando o número de persoal nas fábricas".
Alcoa e Parter chegaron a un acordo, en xullo do ano pasado, para a venda das plantas da Coruña e Avilés, argumentando a primeira que era "inviable" a produción de aluminio primario en España polo "elevado prezo da enerxía".
