As inmobiliarias cargan contra a "incerteza" no aluguer

O aluguer de vivenda encaixou dous cambios normativos en pouco máis dun mes, para acabar volvendo ao pasado á espera do que se poida facer no futuro. E é que o Congreso tombou o martes o decreto que o Goberno aprobou en decembro con novidades en cuestións como a duración dos contratos e devolveu así a vixencia á lei anterior. Así as cousas, agora o Executivo estuda novas opcións de reforma. Neste punto, as inmobiliarias galegas aseguran que se creou un campo de incerteza, inseguridade xurídica e desconfianza".

"Xa había un problema e agora agrándase", lamenta o presidente da Federación Galega de Empresas Inmobiliarias (Fegein), Benito Iglesias, ante un mercado con demanda crecente, oferta minguada e prezos á alza. Non en balde, cre que se xerou "un pequeno caos" que levará a algúns posibles arrendadores a esperar a que "estean as cousas claras" antes de pór unha vivenda no mercado. É dicir, que "retraerá aínda máis ao propietario a alugar ante a inseguridade e polo desconcerto", e —subliña— iso afecta "sobre todo" a quen necesita vivenda.

Son advertencias que tocan a un mercado que, segundo Iglesias, xa se freou algo no último mes, tras a entrada en vigor o 19 de decembro do texto que esta semana rexeitou o Congreso. "Estaba a encaixarse", di o presidente da Fegein, para quen a norma contiña unha novidade na que arrendadores e inquilinos "máis ou menos estaban de acordo" —a ampliación da prórroga obrigatoria do contrato de tres a cinco anos— pero "o demais era penalizar ao propietario". Nesa fase de adaptación, como tamén apunta Aluguer Seguro, nas últimas semanas rexistráronse menos contratos do habitual.

Aínda así, coa referencia das fianzas recibidas no mesmo período de hai un ano no Instituto Galego de Vivenda e Solo (IGVS), pódese dar por feito que neses pouco máis de 30 días de vixencia do decreto asináronse polo menos un milleiro de contratos, que son os únicos para os que seguen vixentes as condicións previstas nese texto. É dicir, a pórroga obrigatoria de cinco anos, a tácita de tres ou o límite de dúas mensualidades aos avais. "Quedaron nun limbo", di Iglesias.

Á espera de posibles cambios, nunha materia na que cre que "ningunha Administración fixo os deberes", rexeita a opción de intervir prezos e aposta por incentivos fiscais que animen a sacar vivenda ao mercado.