O despregamento da intelixencia artificial (IA) nas empresas galegas centrou a sesión inaugural da XII reunión anual do Foro Económico de Galicia, que conclúe este venres no Parador de Muxía coa intervención do líder de CC.OO., Unai Sordo, tras dúas xornadas nas que académicos, empresarios e xornalistas debateron sobre o ritmo da transición enerxética e o uso do galego como factor diferencial.
A profesora da USC María Bastida presentou O desenvolvemento da IA en Galicia: ¿Están preparadas as empresas?, un informe que incide no potencial desta tecnoloxía para impulsar a competitividade das compañías e, polo tanto, das autonomías que a implanten. A predición de tendencias da demanda e a mellora da xestión de riscos son outras derivadas do procesamiento de datos, e a dixitalización e os estudos din que as firmas que abrazan a IA "duplican a rendibilidade do seu investimento".
En declaracións a AGN, a experta en Organización e Dirección Estratéxica da Empresa incidiu en que "urxe acometer unha recualificación do capital humano". E é que a extensión da IA sitúa entre as ocupacións con máis cartas para ser substituídas as baseadas en tarefas "simples e repetitivas". "É certo que pode ameazar postos de traballo, pero a substitución permite a recolocación en postos máis críticos e con maior valor engadido", sinala Bastida, que augura que xurdirán novos perfís profesionais ligados á IA. Cun tecido produtivo no que o 96% dos negocios teñen menos de 10 empregados, a escasa dimensión e a menor dotación de firmas innovadoras frea a expansión da IA.
O informe, que tamén asinan Alberto Vaquero (UVigo), Luis Otero (USC) e o director do Foro e catedrático de Economía Aplicada Santiago Lago, sinala que as firmas galegas "non poden considerarse líderes" nesta tecnoloxía, que aquí está nunha fase de desenvolvemento "incipiente".
Entre os freos, Bastida cita a elevada presenza de pemes e micropemes e a "especialización produtiva en sectores ligados aos servizos, onde hai menor facilidade de desenvolvemento da IA". Con exemplos como o coche autónomo no que está implicada a automoción galega, a experta sinala que dispoñemos de grandes "buques industriais" cuxa capacidade de implantación da IA é superior.
A nube galega é "fundamental" para estender a IA
Tras aceptar o encargo da sociedade Impulsa Galicia, Ingenostrum analiza a viabilidade de crear un gran centro de datos galego neutro en emisións de carbono. María Bastida sostén que será "fundamental" para a penetración da intelixencia artificial, que ten na capacidade de proceso e xestión dun alto volume de información un dos seus "alicerces básicos". Os expertos tamén instan o sector público a apostar pola IA e a facilitar financiamento.
O 26,8% das empresas galegas con dez ou máis empregados con sistemas de IA desenvolvéronos con empregados propios. A maior parte (54,7%) recorre a provedores externos.
