O presidente da Comisión Nacional do Mercado de Valores (CNMV), Sebastián Albella, afirmou que a investigación sobre as perdas comunicadas polo Banco Popular relativas ao seu último semestre como entidade independente se atopan "en fase moi avanzada".
"Continuamos con esa análise e está en fase moi avanzada", sinalou o presidente do supervisor dos mercados durante a súa intervención ante a Comisión de Economía do Congreso dos Deputados, aínda que non ofreceu máis detalles sobre a investigación.
O pasado mes de xaneiro, durante a súa comparecencia ante a comisión do Congreso que investiga a crise, a quebra das caixas de aforro e o programa de asistencia financeira, Albella explicou que o supervisor se atopaba analizando "en que medida" era razoable imputar integramente aos primeiros seis meses de 2017 os últimos resultados do Popular, correspondentes ao primeiro semestre do pasado exercicio, ou se debían haberse imputado en exercicios anteriores.
"Non o concluímos, pero está en fase moi avanzada", explicou en referencia a esta investigación o presidente da CNMV, que formulou varios requirimentos á entidade co obxectivo de analizar os seus últimos resultados, que reflectiron unhas perdas de 12.218 millóns de euros.
Durante o último exercicio completo do Popular como entidade independente, o banco rexistrou o —ata o momento— peor resultado da súa historia, con perdas de 3.485 millóns de euros, tras provisionar 5.692 millóns de euros, fronte ao resultado positivo de 105,43 millóns de euros que rexistrou en 2015.
BANKIA ESTUDIOU COMPRAR O POPULAR. Bankia solicitou información adicional sobre o Banco Popular para estudar a fondo a súa posible adquisición durante o proceso de venda que orquestrou en maio de 2017 Emilio Saracho, o entón presidente do banco, da man do banco de investimento estadounidense JP Morgan.
Así consta na documentación do Proxecto Noya, como se denominou o proceso de venda. A adquisición do Popular, finalmente adxudicado a Santander tras a resolución, ofreceuse ás principais entidades financeiras de España, aínda que Bankia solicitou máis información da que figuraba no data room organizado por JP Morgan.
