A venda de coches sobe un 1% en Galicia en febreiro

As vendas de turismos e todoterreos en Galicia alcanzaron un volume de 3.221 unidades en febreiro, o que supón un lixeiro incremento, do 0,94%, respecto ao mesmo mes do ano anterior, segundo os datos das asociacións de fabricantes (Anfac), concesionarios (Faconauto) e vendedores (Ganvam).

No que vai de ano, é dicir, nos dous primeiros meses de 2017, as matriculacións de coches rexistran na comunidade galega un incremento do 5,98%, ata un total de 6.544 operacións. Por provincias, as vendas subiron na Coruña un 2,88%, ata 1.393, mentres caeron en Pontevedra, cun descenso do 4,36%, ata 1.053. Tamén repuntaron en Lugo, un 16,58%, con 436 matriculacións, e baixaron en Ourense, un 6,35%, ata 339.

No conxunto estatal, as vendas situáronse en 97.796 unidades durante o pasado mes de febreiro, o que supón un leve incremento do 0,2% en comparación co mesmo mes do ano anterior.

Segundo as asociacións, este leve incremento mensual logrouse en febreiro grazas ao empuxe da canle de empresas, que logrou contrarrestar o retroceso experimentado polas vendas a firmas alquiladoras, principalmente porque a Semana Santa caeu en marzo en 2016 e este ano terá lugar en abril.