O Consello de Ministros autorizou unha orde de execución para construír nos estaleiros de Navantia en Ferrol cinco fragatas F-110 por 4.317 millóns de euros, o maior investimento da historia na comarca ferrolá, anunciou este venres o delegado do Goberno en Galicia, Javier Losada.
En rolda de prensa sobre os acordos do Consello de Ministros adoptados esta mañá relacionados con Galicia, Losada detallou que a entrega da primeira destas fragatas está prevista para 2026 e a última en 2031, o que supón carga de traballo desde este ano e por un período de 13 anos.
En 2019 orzaranse os primeiros 41,1 millóns de euros, unha cifra que irá ascendendo en exercicios sucesivos ata completar "o maior investimento que se produce despois da AVE en Galicia", destacou.
Para o clúster do naval, este investimento propiciará que se pase de 200 empresas vinculadas ao sector naval de Galicia a case 280
Así, en 2020 investiranse 61,9 millóns; en 2021, 65,6; en 2022, 115; en 2023, 245,7; en 2024, 398,9; en 2025, 650; en 2026, 835,9; en 2027, 631,7; en 2028, 191,7; en 2029, 199,7; en 2030, 450; en 2031, 384,7; e en 2032, 45 millóns, ata completar un total de 4.317 millóns de euros.
O valor engadido directo e indirecto deste contrato alcanza os 5.400 millóns de euros, supón a creación de 7.000 empregos directos e indirectos, así como 18 millóns de horas de traballo e o 40 % da contratación prevista por Navantia para os próximos cinco anos.
"Dáselle a Navantia unha estrutura de traballo importante para seguir progresando" e "supón dar un paso máis para a conversión do estaleiro nun estaleiro 4.0", continuou Losada.
Para o clúster do naval, este investimento propiciará que se pase de 200 empresas vinculadas ao sector naval de Galicia a case 280, polo que, subliñou o delegado do Goberno, "non só estabilízase o traballo das empresas auxiliares, senón que se incrementa o número de empresas do sector naval".
