Cun cadro de persoal de preto de 7.000 traballadores e unha produción media de 2.300 vehículos ao
Carlos Tavares, o presidente da multinacional, visitou este luns a factoría de Balaídos, onde se reuniu co comité de empresa ao que confirmou que as instalacións "cumpren os obxectivos de calidade e custos" que marca a matriz para ser unha das plantas ás que se adxudiquen novos modelos de vehículos.
En declaracións a AGN, fontes sindicais explicaron que o executivo portugués deixou en mans do director da planta, Ignacio Bo, a confirmación final do investimento —que roldará os 600 millóns de euros— e que todo depende da repartición que realice o Goberno central dos fondos europeos adxudicados a través das próximas convocatorias do proxecto estratéxico para a recuperación e a transformación económica (Perte) do vehículo eléctrico e conectado. En outubro, Stellantis obtivo 6,7 millóns para o seu taller de montaxe e produción de baterías tras conseguir 15,2 millóns un ano antes para o seu proxecto Aries, enfocado a preparar a cadea industrial para producir a nova xeración de eléctricos a partir de 2026 e que conta coa participación da planta madrileña de Villaverde e cunha vintena de empresas e organismos de investigación.
A semana pasada, o ministro de Industria, Jordi Hereu, anunciou para o primeiro trimestre a terceira convocatoria do Perte, que repartirá máis de 1.200 millóns.
As FURGONETAS. Por outra banda, CC.OO. aproveitou a cita con Tavares para interesarse pola substitución da K9, as furgonetas de Peugeot, Citroën, Fiat e Opel. Neste caso, o presidente tampouco confirmou ningún encargo, aínda que si sinalou que Vigo está nunha situación "idónea" para continuar producindo a nova xeración destes vehículos comerciais lixeiros, unha declaración na que a central ve "unha boa noticia".
A reunión co executivo —que durou pouco máis de media hora e contou coa asistencia dos directores da rexión ‘Europa estendida', Uwe Hochgeschurtz, e de fabricación, Arnaud Deboeuf, cos que Tavares percorreu a planta—, prodúcese despois de que a dirección e o comité de empresa asinasen en novembro o convenio colectivo para 2024- 2027, unha folla de ruta que recolle que a adxudicación da plataforma Stla Small é clave para asegurar o futuro da factoría, a máis produtiva de España con 404.585 vehículos ensamblados en 2022.
Ou
tro dos elementos que xogan en favor das instalacións é a modificación que o Ministerio para a Transición Ecolóxica operou na planificación da rede de transporte de enerxía eléctrica para 2026. O documento, sometido a audiencia pública, inclúe 72 millóns para un novo tendido de alta tensión entre Pazos de Borbén e Balaídos e unha subestación ampliada para cubrir a demanda da factoría, pensando no seu plan de electificación.
REUNIÓN CON RODA. Na súa visita a Galicia, o executivo lisboeta reuniuse co presidente da Xunta para analizar o futuro do fabricante de automóbiles en Vigo e os seus proxectos. Segundo informou o Goberno galego nun comunicado, o encontro serviu para "avaliar as oportunidades" que supoñen os fondos Next Generation. O mandatario trasladou o apoio da Xunta ás empresas "que apostan por medrar e ampliar a súa produción" en Galicia.
