O ministro de Fomento, José Luis Ábalos, sinalou este mércores que os aeroportos están a funcionar "con certa racionalidade" e "boa parte" dos voos tamén, cumpríndose os servizos mínimos na folga de tripulantes da aerolínea Ryanair. Segundo as estimacións sindicais, foron 24 os traxectos cancelados cara a ou desde España ata as 15.00 horas nesta primeira xornada de paro. Entre eles, o avión con destino Milán que tería que despegar ás 10.10 da mañá desde Vigo. Os pasaxeiros foron avisados pola aerolínea apenas unha hora antes por correo electrónico e mensaxes enviadas aos seus teléfonos móbiles.
Ademais, canceláronse 22 voos con destino ou orixe en Italia e o voo, tanto de ida como de volta, que conectaba Palma co aeroporto de Charleroi en Bélxica, sinalaron fontes de USO, un dos sindicatos xunto con Sitcpla convocantes da folga fixada para os días 25 e 26 de xullo en España, Portugal e Bélxica. A estas xornadas de protesta únese o paro de 24 horas rexistrado polos sindicatos italianos de pilotos e tripulantes de cabina.
O pasado mércores a aerolínea avanzou que cancelaría ata 200 voos diarios en España pola folga, que representan ata o 24 % dos 830 que tiña previstos cada día. A compañía tamén anunciou a supresión de ata 300 voos diarios en Europa. Ademais anunciou a cancelación de ata 50 voos diarios dos máis de 180 que ten previsto operar en Portugal (27 %) e ata 50 dos máis de 160 voos en Bélxica (31 %).
O Ministerio de Fomento insistiu en que a folga dos tripulantes de cabina de Ryanair, convocada polos sindicatos Sitcpla e USO, desenvólvese sen incidencias reseñables, segundo os datos solicitados pola Dirección Xeral de Aviación Civil na rede de aeroportos de Aena, e subliñou que a aerolínea non facilitou ata agora datos de seguimento.
