O consello de administración de BBVA designou o directivo de orixe turca Onur Genç como novo conselleiro delegado da entidade, segundo informou nunha nota remitida á Comisión Nacional do Mercado de Valores (CNMV). Con este nomeamento, o banco 'azul' pretende recalcar o seu perfil internacional.
Genç, actual conselleiro delegado de BBVA Compass, a filial estadounidense do banco, sucederá no cargo a Carlos Torres Vila a partir do 31 de decembro de 2018, e o seu predecesor pasará a desempeñar as funcións de presidente executivo da entidade, substituíndo a Francisco González. "A sucesión garante a continuidade no proceso de transformación que puxo a BBVA á vangarda da industria financeira global", sinalou o banco nun comunicado, engadindo o impacto "tan positivo" que Genç tivo nas operacións do grupo tanto en Estados Unidos como en Turquía. Asegura que a súa xestión queda totalmente avalada en cifras.
Quero agradecer ao Consello a confianza que depositou en min. Creo profundamente no noso propósito e os nosos valores
BBVA considera que Genç, de 44 anos, é o conselleiro delegado "idóneo" para seguir avanzando na súa estratexia e impulsar a transformación de todas as súas franquías, xerando valor para todos os grupos de interese, desde os accionistas, pasando polos clientes e os empregados.
"Quero agradecer ao Consello a confianza que depositou en min para afrontar este gran reto", indicou o que será o número dous de BBVA. "Creo profundamente no noso propósito e os nosos valores. Estou moi contento de formar parte do proxecto de transformación de BBVA", engadiu.
