A veda da captura de polbo en Galicia comezará ás 16:00 horas deste venres, día 17 de maio, e terminará ás 5:00 horas de luns, 1 de xullo. Así o especifica a resolución do plan experimental para a xestión desta especie para a campaña 2019/2020, que establece o período de veda do polbo que se inicia este venres.
As capturas desembarcadas o 17 de maio poderán ser comercializadas tamén o 18 de maio naquelas lonxas nas que tradicionalmente se viñan realizando vendas de polbo os sábados.
O período de veda do polbo, remarcan desde a Xunta nun comunicado, significa que queda expresamente prohibida a captura desta especie, por medio de calquera arte, en augas nas que Galicia ten competencias en marisqueo. Polo tanto, as embarcacións dedicadas á captura deste cefalópodo con nasas deberán retiralas do seu calado e levalas a porto. O tempo de veda é tamén aplicable á pesca marítima de recreo e ás capturas con calquera outra arte distinta da nasa para polbo.
Recorda o Goberno autonómico que a veda é unha das medidas técnicas que comprende o plan de experimental da especie, co fin de axustar a xestión pesqueira ao seu ciclo de vida e así protexer a súa reprodución e contribuír a unha explotación máis sostible.
A Consellería do Mar e o sector acordaron un novo plan do polbo para o próximo ano, informa un comunicado, que entra en vigor este venres e que permanecerá vixente ata que se publique o plan do ano que vén, que fixará a seguinte veda.
Segundo establece o citado plan, a partir do día 1 de xullo, data na que finaliza a veda, ata o 31 de agosto, a cota máxima de captura desta especie é de 30 quilos por barco e día. A esta cantidade engádenselle 30 quilos ao día por cada tripulante a bordo, ata un máximo de 210 quilos ao día.
No que resta de campaña a cota máxima será de 50 quilos por embarcación e día, cantidade á que se lle engaden 50 quilos ao día por cada tripulante, ata un máximo de 350 quilos por día.
