O secretario xeral do PSOE, Pedro Sánchez, proporá ao comité federal do partido manter o 'non' a Mariano Rajoy e intentar liderar a formación dun Goberno.
Segundo informaron este xoves fontes da dirección socialista, no comité federal do próximo 1 de outubro Sánchez avogará por manter o voto negativo á investidura de Rajoy.
Xunto a esta negativa, Sánchez proporá ao máximo órgano do PSOE entre congresos intentar formar un Goberno "alternativo", aínda que non precisaron con que partidos negociarán.
O comité federal do PSOE reunirase o próximo 1 de outubro para debater sobre a situación de bloqueo e que saída pode haber para evitar novas eleccións, ademais de analizar os resultados das eleccións vascas e galegas do próximo domingo 25.
A convocatoria do comité federal ten lugar despois de que algúns "baróns" do partido, como o estremeño Guillermo Fernández Vara, a andaluza Susana Díaz e o castelán-manchego Emiliano García-Page, defendan a necesidade de abrir un debate interno para ver como desatascar o escenario político.
A postura que adopte o máximo órgano do partido antóllase decisiva para ver se é posible a formación de Goberno antes de que expire o prazo a finais de outubro.
No seu discurso nun acto electoral do PSE-EE na localidade biscaíña de Portugalete, Sánchez non se referiu a esta proposta de intentar formar Goberno, aínda que si reiterou, entre aplausos dos asistentes, que volverá votar contra a investidura de Rajoy.
Así, explicou que o PSOE "sempre votou 'non' e seguirá votando 'non'" á investidura de Rajoy pola súa falta de "exemplaridade" ante os "moitísimos dirixentes" do PP implicados en casos de corrupción.
"En política, como na vida, o que cala, outorga. Hai silencios estrondosos e o de Rajoy con Rita Barberá é un estrondo de conivencia coa corrupción e sobre todo por iso votaremos 'non' a Rajoy", asegurou o líder socialista.
Sánchez negou que o PSOE sexa "o partido do non" e sostivo que é o partido dun "si con moitos nons: non á corrupción, non á desigualdade, non ao desemprego e non á pobreza que trouxeron as políticas do Partido Popular".
Sánchez proporá ao comité federal intentar formar unha alternativa de Goberno
O líder socialista manterá o seu 'non' a Rajoy ante a posibilidade dunha nova investidura do líder do PP, aínda que tampouco se precisa con que partidos negociará
