O 016 rexistra no ano 2015 o seu máximo histórico de chamadas telefónicas

O teléfono 016 de axuda contra a violencia de xénero rexistrou un total de 81.992 chamadas o ano pasado, o seu máximo histórico desde que se creou este servizo en 2007, e aumentou un 19% respecto da cifra de 2014, segundo o balance do Ministerio de Sanidad, Servicios Sociales e Igualdad.

O ano pasado superouse "con fartura" o maior volume logrado ata agora, que foi o do 2008 cun total de 74.951 chamadas.

Ademais, os meses de outubro e decembro marcaron tamén unha marca, cando se atenderon máis de 8.000 chamadas (8.458 e 8.129, respectivamente).

A pesar destes datos, cabe recordar que decembro, xunto con xullo, foi un dos meses máis tráxicos para a violencia machista e, segundo os datos do Ministerio, das 54 mulleres asasinadas en 2015, oito o foron no último mes do ano.

O ministro de Sanidad, Servicios Sociales e Igualdad, Alfonso Alonso, mostrouse satisfeito polos datos que segundo a súa opinión reflicten que cada vez máis "se está rompendo o silencio cómplice da violencia de xénero" e chamou a "non baixar a garda contra a violencia machista".

O sistema de atención telefónica empezou a funcionar o 1 de agosto de 2007 e ese mesmo ano rexistrou 15.715 chamadas.

En 2008 atendéronse 74.951 chamadas, que baixaron ás 68.541 o ano seguinte, o 2009, e a 67.696 en 2010.

Volveron subir as chamadas ao 016 en 2011 cando se rexistraron un total de 70.679, pero en 2012 caeron en picado ás 55.810, o menor volume histórico.

A partir de entón, a subida foi paulatina: 58.274 en 2013 e 68.651 en 2014.

O teléfono gratuíto, que non deixa rastro nas facturas, é un dos instrumentos esenciais para combater os malos tratos contra a muller, e funciona todos os días do ano ata en 52 idiomas.

Desde o Ministerio aseguraron nun comunicado que España dispón dun dos sistemas de detección de violencia contra a muller máis avanzados do mundo, apoiado na "prevención, protección, asistencia e recuperación".

Os datos da Macroenquisa de Violencia de Xénero de 2015 esclarecen que o 77% das mulleres que sufriron malos tratos, logra refacer a súa vida, é dicir, máis de sete de cada dez mulleres maltratadas.